"Bizi osoko zigorra" bertan behera uzteko eskatu dute Madrilen

Iturria: Berria.info

Argazkian, Madrilen gaur agerraldia egin duten kideak.

Herrira mugimenduak deituta, Fran Balda eta Manu Ugartemendia Herrira-ko kideekin batera Madrilen Parot doktrinaren aurkako agerraldia egin dute Amaiurreko Sabino Cuadra eta Jon Iñarritu diputatuek eta Alberto Unamunzaga senatariak, Aralarreko Dani Maeztu eusko legebiltzarkideak, LABeko idazkari nagusiaren alboko Jabi Garnikak, Bilgune Feministako Saioa Iraola eta Idoia Trenorrek, Eleak giza eskubideen mugimenduko Txerra Bolinagak eta Etxerat euskal presoen senideen elkarteko Mattin Troitiñok.

"Madrilera etorri gara gaur, berriro eskatzera bizi osorako zigorra bertan behera uzteko", esan dute Espainiako Auzitegi Nazionaletik gertu, prentsaurreko batean. Hain justu, auzitegiak gaur ekin dio Europako Giza Eskubideen Auzitegiak 'Parot doktrinaz' emandako kontrako epaia aztertzeari, baina ondoren jakinarazi du urriaren 10era atzeratu duela saioa.

Urtarrilaren 7ko mobilizaziorako deia egin dute 400 preso ohiek

Bideoan, 400 preso politiko ohik Azpeitiako pilotalekuan eskainitako agerraldia / © Gara.

Urtarrilaren 7an Bilbon egingo den mobilizazio orokorra indartzeko deia egin zuten aste hasieran. Mobilizazio honen inguruan Euskal Herriko herri guztietan preso politikoen askatasunaren aldeko Herri Bilguneak sortzeko deia egin dute. Herri Bilgune horiek osatzeko orduan irizpide zabalak eta herritarrak lehenesteko ideia azpimarratu dute. Honekin batera, Euskal Preso Politikoen Kolektiboak (EPPK) ezagutzera eman zuenez, preso politiko guztiek eskaera aurkeztuko dute ahalik eta lasterren Euskal Herrira ekar ditzaten. Ekimen kolektibo horrekin dispertsio politika gainditzeko eta amaitzeko helburua bilatzen dute. Horretaz gain, haien artean batzarrak egiteko aukera eskatu dute. Eskakizun horrekin abian dagoen prozesu demokratikoan haien ekarpen eraikitzaileak egiteko bidea eta aukera bilatu nahi dute. Igandean bertan, 400 bat preso ohiek agerraldi jendetsua burutu zuten Azpeitiko pilotalekuan. Bertan 7ko manifestaziora joateko eta mobilizazio orokorra indartzeko deia zabaldu zuten. Gainera gatazkaren mamiak konpontzeko deia egin zuten eta hori dela eta Euskal Herriko jendarteak bere protagonismoa eduki dezan deia egin zuten.