Urte amaieran ere euskal preso eta iheslari politikoen alde!

Kaixo lagun,
 

Abenduko Azken Ostirala dugu urtean zeharreko ekitaldirik berezienetakoa. Aurten ere elkarretaratze deigarria, polita, hunkigarria... egin gura dugu, preso eta iheslariak gure artean behar ditugula aldarrikatu eta, bide batez, senideei herritarren babesa eta berotasuna helarazteko, gatibu zein familiarrentzat horren berezia izaten den urteko garai honetan. Horregatik, zuengana jotzen dugu beste behin ere, ekitaldian parte-hartzeko gonbitea eginez. Elkarretaratzea 20:00etan izango da bihar Algortako Telletxe plazan.

Bestalde, urteko azken egunerako, abenduaren 31rako, beste ekitaldi bat prestatu dugu. Triki-poteoa eta brindisa egingo ditugu: 19:00etan jarri dugu horretarako hitzordua, Amnistia tabernan.

Bihar zein astelehenean elkar ikusiko dugulakoan, ondo izan.


ALGORTAKO HERRIRA BILGUNEAREN TALDE DINAMIZATZAILEA

Valladolideko espetxeko hormetaraino eramango dute Kitxu askatzeko aldarria

Gabon egunetarako hainbat ekitaldi antolatu ditu Itzubaltzetako Herrira bilguneak. Tartean, igande honetarako, abenduak 23, Villanublako (Valladolid) espetxerako autobusa antolatu dute, bertan preso dagoen Iñaki Gonzalo Casal "Kitxu" herrikideak entzun ditzan. Horrenbestez, goizeko 8etan abiatuko dira Itzubaltzeta / Romoko Sabecotik. Aurretik eman beharko da izena, Branka herriko tabernan. Getxo irratiko eta Egin irratiko kazetari izandakoa 1994ko urriaren 25ean atxilotu zuten Areetako Bizkaiko Zubiko plazan, Andoni Muñoz urduliztarra, eta Algortako Iñigo Otazua "Oti" zein Angel Figueroarekin batera. Ekintzarik burutu ez zuen Lanbroa komandoko kideak izatea leporatu zieten lauei, 30 urteko zigorra ezarriz. "Kitxu"-k hainbat liburu idatzi ditu espetxean.

Egitaraua:

Abenduak 23, igandea
08:00 Valladoliden Kitxuk entzun gaitzan busa (izena eman aurretik Brankan), Sabecotik abiatuta.

Abenduak 24, astelehena
20:30 Olentzeroren kalejira herrian zehar, Brankatik.

Abenduak 28, ostirala
20:00 Urteko Azken Ostiraleko elkarretaratzea.

Abenduak 31, astelehena
20:30 Preso eta iheslaririk gabeko Urte Barriaren aldeko brindisa, Gobelondo eta Aurrezki Kutxa kaleen kantoian.

Kitxu askatu!
Preso eta iheslariak herrira!

Xabier Makazaga iheslariak hitzaldia eskainiko du bihar Algortan

Argazkian, Xabier Makazaga iheslariak bideokonferentzia bidez parte hartu zuen Ataramiñe elkartearen uzta berriaren aurkezpenean, azaroaren 27an / cc-by Ukberri.net.

Gabonen inguruan prestatutako euskal preso eta iheslari politikoen aldeko ekitaldien artean, bihar, osteguna, "Ataramiñe'12" idazlan kolektiboaren aurkezpena hartuko du Eztabaida Guneak, 19:30etik aurrera. Horrekin batera, Bruselan dagoen Xabier Makazaga iheslari zarauztarrak bideokonferentziaz eskainiko du "Errealitatea eta fikzio gatazka politikoan" izenburuko hitzaldia. Hain zuzen ere, Makazagaren "Sasian barna" argitaratu du aurten Ataramiñe elkarteak. Gogoratu, bihar, Adierazpen Eguna ere izango dela. Hartara, ikastetxean, lanean edo kalean zaudela, urtarrilaren 12ko Herri Mobilizazio Orokorreko pegatina eramatera gonbidatzen zaitugu. Gainera, horri jarraiki, "Euskal presoak Euskal Herrira! Euskal presoak lantokietara!" lelopeko elkarretaratzea egingo du Algortan Eskumaldeko LABek. Hitzordua 12:30ean jarri dute Telletxe plazan.

Hurrengo hitzorduak:

Abenduak 21, ostirala
20:00 Elkarretaratzea, Algortako Telletxe plazan.

Abenduak 24, astelehena
Presoak Olentzerorekin, Algortako Amnistia tabernatik.

Abenduak 28, ostirala
20:00 Urteko Azken Ostiraleko elkarretaratzea, Algortako Telletxe plazan.

Abenduak 31, astelehena
19:00 Triki-poteoa eta brindisa, Amnistia tabernan. 

Euskaraz idaztea debekatu diete euskal preso politikoei Algecirasen

Argazkian, besteak beste, Gorka Garcia Sertutxa "Patas" algortarra preso daukate Algecirasen.

Iturria: Naiz.info

Algecirasko espetxeko zuzendaritzak Gabonak zoriontzeko postaletan euskara erabiltzea debekatua dagoela nabarmentzen duen gutuna igorri die euskal preso politikoei. "Zorionak eta urte berri on", "Eguberri on", "Urte berri, bizitza berri", "Errege magoen gutuna", "Badator Olentzero", "Gabon gau zoriontsua izan" edo "Gabon zahar zoriontsua izan" gisako esamoldeak baino ez ditu onartuko Algecirasko espetxeak euskal presoek igortzen dituzten postaletan. Gainontzeko guztia gazteleraz idatzi beharko dute halabeharrez presoek, bai behintzat espetxeak postalak itzultzea nahi ez badute.

Bitxia den beste esamolde bat ere onartzen du Algecirasko espetxeak: "Zortea Loteria zozketan". Estatu espainolak berak antolatzen duen zozketa aipatzea, euskaraz bada ere, ez du begi txarrez ikusten, antza.

Bihar pegada-poteoa Algortan eta larunbatean murala Txorimalon!

Argazkian, Xabier Makazaga iheslariak bideokonferentzia bidez parte hartu zuen Ataramiñe elkartearen uzta berriaren aurkezpenean, azaroaren 27an / cc-by Ukberri.net.

Algortako Herrira bilguneak ostiral honetan, abenduak 14, abiatuko ditu Gabonen inguruan prestatutako euskal preso eta iheslari politikoen aldeko ekitaldiak. Horrenbestez, bihar, pegada-poteoa egingo dugu, 18:00etan Amnistia tabernatik abiatuta; eta 20:00etan, ohiko lez, kontzentrazioa izango da Telletxe plazan. Algortako Gazte Asanbladak (AGA) antolatutako Okupazio Astearen barruan, berriz, hainbat eragileetako lagunak horma-irudiak pintatzen izango dira Getxoko Txorimalo gaztetxean. Hitzordua goizeko 10etan jarri dute, eta Algortako Herrira bilguneko kideok ere egongo gara murala margotzen. Edonor igo daiteke gaztetxera horma-irudiak egiten laguntzera. Hortaz, animatu eta parte-hartu!

Gabonetan... Algortako presoak herrira!

Urtarrilaren 12ko herri mobilizazio orokorrera bidean, euskal preso eta iheslari politikoen aldeko ekitaldi ugari antolatu ditu Algortako Herrira bilguneak:

Abenduak 14, ostirala
18:00 Poteo-pegada, Algortako Amnistia tabernatik abiatuta.
20:00 Elkarretaratzea, Algortako Telletxe plazan.

Abenduak 17, astelehena
19:00 "Barrura begiratzeko leihoak" dokumentala, Algortako kultur etxean, Villamonten.

Abenduak 20, osteguna
19:30 "Ataramiñe' 12"-ren aurkezpena eta bideokonferentzia, Algortako Eztabaida Gunean.

Abenduak 21, ostirala
20:00 Elkarretaratzea, Algortako Telletxe plazan.

Abenduak 24, astelehena
Presoak Olentzerorekin, Algortako Amnistia tabernatik.

Abenduak 28, ostirala
20:00 Urteko Azken Ostiraleko elkarretaratzea, Algortako Telletxe plazan.

Abenduak 31, astelehena
19:00 Triki-poteoa eta brindisa, Amnistia tabernan. 

Gabonetan Algortan, presoak etxera!