EPPK: "Espetxe politika hiltzailea"

Argazkian, martxoaren 15ean, iluntzean, 800 lagun baino gehiago batu ziren Anjel Figueroaren heriotza salatu eta preso politiko gaixoak orain aska ditzatela aldarrikatzeko.

Martxoaren 14an hil da etxean preso, Anjel Figueroa. Gaixorik, espetxetik irtetea lortu arren Espainiako espetxe administrazioaren menpe eta haren ardurapean zendu baita. Gobernu espainiarraren ardurapean. 

Beste heriotza segidan, Xabier Lopez Peñarena. Frantziar espetxe eta justizia administrazioaren ardurapean. Eri zen, eta kalean behar zuenean hil da preso. Ezin pasatzen utzi, frantses arduradunen jokaera laidogarri eta makabroa, beste behin ere. Bahiturik, isolaturik, azken arnasetan non eta nola zegoen senideei informazioa ukatuz. Baita hil geroztik ere, maltzurki. 

Gure dolumin sentikorrenak bion senide eta lagunei! 

Bi heriotz berri, espetxe politikaren zerrenda luzean. Eri ziren biak, espetxe politikak erahil ditu biak. Espetxe politika hiltzailea baita! Sakabanaketa hiltzailea baita! Heriotz zigorrak arduradun zehatzak ditu. Estatuen gerra estrategian murgildurik dirautenak. Euskal presookin politika kriminala gauzatzen jarraitzen dutenak. Gatazka politikoa eta bere ondorioak ETAri leporatzen diotenak. Diskrezioa lege eta legea diskrezional egiten dutenak eta bi zerraldo berrion aurrean ere ardura saihestu nahi izan dutenak. Inmunitate politiko eta penala betiereko uste dutenak. 

Konponbideari bizkar ematen jarraitzen baitiote. Gertaera hauen testuinguruan, ETA eta Gobernu espainolak (PSOE) konponbiderako irekitako gunearen deuseztapena iragarri du ETAk; salatu duenez, boterean den Gobernuaren (PP) temakeriaren ondorioz. Egoera politikoa larria da konponbide demokratikoaren alde gaudenontzat, gatazka luzatzeko arriskua handia baita. 

Heriotzon artean aldiz, Iruñea-Bilbon Gatazkaren konponbidearen Foro soziala izan da. Gatazkaren ondorioen inguruan nazioarteko esperientzia eta irakaspenak ekarri dira, gogoeta sakonduz. Konponbidea zaildu eta atzeratzea behartu nahi gaituzte, baina konponbide demokratikoaren aldeko ahalegin eta indar oro bide berriak irekitzeko oinarri garrantzitsua dira. Aieteko adierazpena nazioartean modu esanguratsuan jasotzen ari den babesa bezala. Estrasburgoko auzian, oraino ‘injinaritza juridiko’rako tartea badutela aurreratu arren, espetxealdia luzatzeko doktrinaren kontrako posizionamendu sozial eta insitituzional zabala bezala. Herriaren, herritarren erantzun eta mobilizazio iraunkorrak bezala. 

Heriotz hauei beste gertakariak gehitu nahi dizkiegu, salaketa ohar honetan. Jaengo espetxetik bueltan Jabi Martinez kidearen lagunek izandako istripua, sakabanaketaren hamaikagarrena! Eta Joseba Vizan errefuxiatuaren aitagiarreba Jose Marcoren heriotza, hura bisitatzera joana Brasil urrunera. 

Saminak eta amorruak ez digu norabidea lausotuko. Konpromisoa hartu du EPPK-k eta bururaino eramango dugu. Egoeraren larritasunak eta gertaera hits hauek orain tamainako erantzuna behar dute. Herriak ez du barkatuko! 

Inoiz baino ozenago, Euskal Presoak Euskal Herrira! Sakabanaketa hiltzailea! Amnistia, autodeterminazioa!

EPPK

Euskal Herria bihotzean, 2013ko apirilan

Etxeratek Xabier Lopez Peñaren heriotza eta bere inguruan egondako argitasun falta salatu ditu

Nagore Lopez de Luzuriaga (Etxerat):

 

Hasteko, Xabier Lopez Peñaren senide eta lagunei gure doluminak eta elkartasun sendoena helarazi nahi dizkiegu. Jasan behar izan duten egoera eta tratamendua lotsagarri eta onartezinak dira, gogorki salatzen ditugu eta bakoitzaren ardurez egia osoa izatea exijitzen dugu.

Beste behin ere, espetxeko administrazioaren bortizkeriak larriki jo du familia bat, krudelkeria azken muturreraino emanez. Garrantzitsua deritzogu gogoraraztea Xabier Lopez Peñaren heriotzak izan duen informazio eza eta gardentasun falta. Martxoaren 11n ospitalera joan zen zaintza batzuk jasotzera soilik, eta 19 egun beranduago hilda dago. Ospitaleratu zutenetik, senideek eta abokatuak bere berri izan arte bederatzi egun igaro ziren. Zorigaiztoko ebakuntza batek eraginda, ziurrenik, bere egoera larria izatera pasa zen, egonkor zegoen arren. Bere egoerak okerrera egin zuen burmuin isuri baten ondorioz ematen duenez. AIGra eraman eta bertan bihotzeko batek eman ziola pentsa genezake; baina ezin ziurtasunez jakin, izan ere oraindik ezin izan baitute ez Xabier bera ikusi ez eta inolako informerik izan. Autopsian konfiantzazko medikurik egoten ez dute utzi, eta heriotza bera ere ez zitzaion familiari jakinarazi, 13 ordu beranduago bisitan zihoazela eta jakin zutenera arte. Senideek egun guzti hauetan izan duten informazio falta eta informazioa jasotzeko ezarri dizkieten zailtasunak egoera oso iluna dela erakusten digute. Eta heriotzaren aurretik eta ondoren erantzunik gabeko hainbat galdera geratu dira zalantzan. Galdera gehiegi. Horregatik gardentasun osoz guzti hau argitzea exijitzen dugu.

Doluminekin batera, beraz, sentitzen ditugun pena eta izugarrizko amorrua ere adierazi nahi ditugu. Urte asko daramatzagu egoera horietara ekartzen gaituen espetxe politika ozenki salatzen. Urte asko daramatzagu neurri berezien desaktibazioa eskatzen, beste dramak itxoin gabe. Eta etengabe drama horiek bizitzen segitzen dugu, bi estatuen isiltasun eta mespretxu osoa jasoz erantzun bezala.

Presondegian, kondena luzeek, baldintza kaskarrek eta neurri bereziek sortzen edota larritzen dituzte eritasunak. Eta presoak, behin eri, berriz baldintza kaskar, neurri berezi eta espetxeak ematen dituen oztopo guztiengatik, EZIN DU bere burua sendatu behar eta mereziko lukeen bezala. Horregatik, eskubideen errespetua - tartean jarraipen mediku egoki eta zuzena izateko eskubidea - eta larriki eri diren presoak berehala askatzea aspalditik eskatzen dugu.

Nahiz eta aldarrikapen hori gero eta gehiago garatu Euskal Herriko eta nazioarteko gizartetan, elkor eta geldirik jarraitzen du frantziar estatuak ere. Modu hotz eta krudel batez aplikatzen ditu diseinatutako plan goibelaren osagarri guztiak.

Sendatzeko eskubidea ukatzea kondenen luzapen amaigabearekin artikulatuz, kartzel kondena heriotz kondena izatera pasatzen da. Urrunketa eta sakabanaketa politika funtsezko tresna bat da plan horretan, senideen, abokatuen eta konfiantzazko medikuen egoera ahalik gehiena zailduz, Xabier Lopez Peñaren kasuan gertatu den bezala.

Duela bi aste hil zen Angel Figeroarekin, 16 preso hil ziren orain arte preso zeudela, eta beste 9 espetxetik atera eta laster. Beste bat aste honetan, nork segituko du guri eta gure senideei aplikatzen diguten politika hiltzailea dela ukatzen?

Beste adibide ainitzen artean, hilabete honetan, Lannemezan-eko kartzelan dagoen Ibon Fernandez-en kasua salatu genuen. Bi urte pasatu dira diagnostikoa eman arte : esklerosi anitzkoitza. Aste batzuk leheneago, Saint Maurko kartzelan gau oso batean Jon Bienzobas odolez husten utzi zutela salatu genuen ere bai. Eta gaur Xabier-ena. Hori guztia frantziar agintarien eskutik. ASKI DA. Aski da hitz politak entzun arren, infernu horretan berdin-berdin segitzea.


Eta guzti honetako sekulako ardura du Frantziako gobernuak. Gure eta gure senideen bizitzekin jolasteaz utzi behar du. Politika krudel eta kriminal honekin bukatu behar da IA.
Honenbestez, gaur hemen salatzen ari garen zoritxarreko eta muturreko egoera hau errepika ez dadin beharrezkotzat jotzen dugu:

- Xabierren heriotzaren inguruko nondik -norakoak gardentasun osoz argitzea.

- Frantzia eta Espainiako kartzeletan dauden 15 preso eri askatu behar dira BEREHALA. Baita neurri zorrotzekin haien etxetan espetxeratze arinduan direnak ere. Eskubideak, eta tartean SENDATZEKO eskubidea, errespetatuak izan behar dira ORAIN.

- Kondenak luzatzen dituzten neurri guztiekin amaitu behar da.

- Sakabanaketa, urrunketa eta isolamendu mota guztiak, desaktibatu behar dituzte BEREHALA.

Eta azken finean, guztia laburbilduz: gure senide eta lagunak ETXEAN ETA BIZIRIK NAHI DITUGU!

Xabier Lopez Peñarekin gertatutakoa argitzearen beharra azpimarratu dute Baionan

Herrirak, Etxeratek, Jaiki Hadik eta Xabier Lopez Peñaren abokatua zen Yolanda Molinak gaur Baionan egindako agerraldi publiko batetan, guztiek Galdakaoko bizilagunaren kasuan utzi dituen zalantzak, kezkak, eskubide urraketak eta puntu ilunak azpimarratu dituzte. Horrekin batera, senideek pairatu behar izan duten sufrimendua eta horrelako egoerak berriro ere errepikatu ez daitezen neurriak hartzeko garaia dela aldarrikatu dute. Egia nahi dugu.

Herrira mugimenduak beste agerraldi bat egingo du bihar Bilbon. Bertan, ondorio tragiko eta atzeraezinak eragiten dituzten salbuespeneko neurriek amaiera exijitzeko mobilizazio berriak iragarriko ditu.

Herrira: "Xabier Lopez Peña euskal preso politikoaren heriotzaren aurrean"

Lehenik eta behin, Herrira mugimenduak babesa eta gertutasuna eskaini nahi dio Xabier Lopez Peñaren senide eta ingurune osoari. Jaso dezatela besarkada sentikor bat.

Xabier Lopez Peñaren heriotzak oinarrizko giza eskubideak urratzen dituen espetxe politika anker baten ondorioak agerian uzten ditu. Izan ere, salbuespeneko neurrien bitartez, espetxe politikak euskal preso politikoen bizitzak etengabeko errusiar erruleta batetan murgiltzen ditu. Espetxe politikak mina eta sufrimendu sortzen ditu hainbat herritarrengan. Errealitate lazgarria da euskal jendartearen gehiengoak eskubideen urraketak atzean utzi eta gehiegi luzatzen ari den gatazkaren ondoriozko heriotza gehiagorik ez izatea desiratzen duenean, espetxe politikaren ondorioek hiltzen jarraitzea.

Sakabanaketa, isolamendua, zigorren luzapena, bizi baldintza negargarriak, erasoak, tratu ez duina, osasun asistentzia desegokia, larri gaixo dauden presoak espetxean mantentzea… Guztiak, heriotzak eragiten dituen koktel makabro baten ingredienteak dira.

2013ko martxoak espetxe politikaren ondorio atzeraezinak era ezin gordinagoan azaleratu ditu. Larri gaixo zeuden Xabier Lopez Peña eta Angel Figueroa presoen heriotzak, Jaeneko espetxe urrunetik bueltan Jabi Martinez Izagirre presoaren bi lagunek pairatutako istripua edo Xabier Aranburuk, Oskar Barrerasek eta Arkaitz Bellonek sufritutako jipoiak horren eredu argia dira.

15 dira egun larri gaixo dauden euskal preso politikoak. Minibizia, esklerosi anikoitza edo eskizofrenia bezalako diagnostikoekin. Preso hauek aske geratu behar dira, hori baita osasun asistentzia egokia izan eta Figueroa edo Lopez Peñaren kasuak ez errepikatzeko berme bakarra.

Euskal jendarteak soluzioak exijitzen ditu, giza eskubide guztien errespetua, espetxe politikaren erabateko aldaketa eta elkarlanaren bitartez konponbidea eta bakea eraikitzea. Bide horretan, espetxe politika ondorio tragikodun traba erraldoia da. Horiek horrela, Baiona eta Bilboko mobilizazio erraldoiek erakutsi bezala, Herriraren aburuz ezinbestekoa da konpromisoak aktibatzen jarraitzea eta milaka herritarren bihotza kolpatzen dituen eskubide urraketa honi erantzun sozial zabala eskaintzea. Euskal jendartearen gehiengoaren mandatua eskutan hartuta, Herrirak atsedenik gabe lan egingo du Angel Figueroa eta Xabier Lopez Peñaren kasuak berriro ere errepikatu ez daitezen eta indarrean dagoen espetxe politika krudelarekin amaitzeko.

Azkenik, Herrirak jadanik egoera hau salatzeko eta berriro ere errepikatu ez dadin exijitzeko, bi mobilizazio aurreratu ditzake. Aurrenekoa, bihar, igandea, 20:00tan Basauriko Benta Plazan. Bigarrena, astelehenean, ordu berdinean, Galdakaoko Zamakoa Plazan.

Eskerrik asko

Herrira

Xabier Lopez Peñaren heriotza salatzeko mobilizazioak egingo dituzte bihar zein etzi Basaurin eta Galdakaon

Une latz hauetan, dolumin eta berotasun sentituenak helarazi nahi dizkie Xabier Lopez Peñaren senide eta lagunei Algortako Herrira bilguneak. Horretaz gain, herritar orori dei egin nahi diogu heriotza salatzeko deitutako mobilizazioetan parte hartzera:

- Martxoaren 31n, 20:00etan, Bentan (Basauri).

- Apirilaren 1ean, 20:00etan, Zamakoan (Galdakao).

Martxoak espetxe politikaren krudeltasuna eta ondorio atzeraezinak azaleratu ditu: hilaren 14an, gaixotasun larri eta sendaezina zuen Anjel Figueroa Fernandez algortarra zendu zen, etxean preso zeukatela. Gaur, hilak 30, Xabier Lopez Peña hil egin da.

Berriro gerta ez dadin, preso gaixo larriak herrira!

Xabier Lopez Peña preso politiko galdakoztarra hil egin da

Herrirak eta Etxeratek baieztatu dutenez, Xabier Lopez Peña euskal preso politikoa hil egin da Parisko Pitie-Salpetriereko ospitalean. Galdakaokoa zen, eta 54 urte zituen. Senideek Etxerati azaldu diotenez, 01:00ean hil da, baina haiek 13:00etan izan dute heriotzaren berri, hura bisitatzera joan diren unean.

Martxoaren 13an odol isuria izan zuen burmuinean, eta ebakuntza egin zioten galdakoztarrari. Ostegunean egoera okertu zen, eta Zainketa Intentsiboen Unitatean sartu zuten. Familiakoek astebete geroago jakin zuten arren, martxoaren 11n eraman zuten presoa erietxera Fleury-Merogis espetxetik (Paris). Etxerat-ek jakinarazi zuenez, gaitz kardiobaskularrak zituen, eta egun horretan bihotzekoak eman zion. Corbeil-Essonnesko erietxera eraman zuten aurrena, baina "zailtasunak" izan ostean, erietxez aldatu zuten martxoaren 13an, eta Pitie-Salpetriereko ospitalera eraman zuten. Ebakuntza bat egin zioten han. 2006-2007an Espainiako Gobernuaren eta ETAren artean izan ziren negoziazioetan parte hartu zuen Lopez Peñak. 2008ko maiatzean atxilotu zuten, negoziazio mahaia apurtu ostean.

Etxeratek ohar baten bidez salatu du espetxearen aldetik izandako "isilpekotasuna eta bere senideekiko desinformazioa". Lopez Peñaren "gaixotzea, ospitalizatzea eta heriotza isilpetu" dituztela adierazi du. "Bisitak burutzea ere atzeratu eta oztopatzea ere gertatu izan da bere osasun egoera kritikoa izanda ere", gaineratu du elkarteak. Maribi Ugarteburu ezker abertzaleko kideak Twitter bidez azaldu duenez, "hil eta gero ere familiari ez diote uzten gorpua ikusten".

Berriro gerta ez dadin, preso gaixo larriak herrira!

Agur eta ohore, Anjel!

Ikusi argazki bilduma

Gaur iluntzean, 800 lagun baino gehiago batu gara Anjel Figueroaren heriotza salatu eta preso politiko gaixoak orain aska ditzatela aldarrikatzeko.

Hona hemen irakurritako idatzia:

Agur eta Ohore, Anjel! 

Minak eta amorruak batu gaitu gaurkoan hemen. Gure herrikide Anjel Figueroa preso politiko gaixoa atzo zendu zen etxean espetxeratze arindu egoeran, 41 urte baino ez zituela. 

Lehenik eta behin doluminak eta elkartasun guztia adierazi nahi diegu bere senide, lagun eta hurbilekoei. 

Internazionalista zen Anjel. Beste herri batzuetan egonda sakonago ezagutzea tokatu izan zaigu. Adibidez, Argentinan egonda diasporako kideek egindako presoei gutunkada batean, han zegoen eta erreferentziaz ezagutzen zuen beste algortar baten eskuetan, hamarna gutun artean, Anjelena jauzi zenean. Gutunaren azalean, Aixerrotako labarra, landak... Edota Kuban ibili zenean euskal brigada internazionalista batean. 

Auzolanaren defendatzaile sutsua zen ere, gure Anjel. Sarritan entzun diogu sasoi bateko Euskal Herriko auzolana hura, asanblearioa, hitza guztiei zabalik, lana denon artean egitekoa... 

Anjel zirikatzaile eta ironikoa zen. "Kartzelero" deitu zion kartzelero bateri, auzitara jo eta irabazi egin zuen, etsaiaren terrenoan ere "kartzelero" deitzeko eskubidea. Hortik aurrera esaten omen zion "ez baduzu nahi kartzelero deitzerik utzi zure kartzelan lan egiteari". 

Txikiaren maitale eta erreibindikatzailea zen Anjel. Kalera ateratako bere lanetako batean, mugimendu independentistaren hausnarketa kritikoa egiten zuen, hirietan ematen diren harremanak oso zailak zirela eta benetako iraultza bat egiteko. Herri txikietatik hasi beharra zegoela esan egin zuen, batean edo bestean. 

Militantea zen Anjel. Gorputz eta arimez. Horregatik hartu zuen hartu zuen konpromisoa. Militanteok ditugu, gure ibilian irabazi eta galerak, garaipenak eta derrotak, kolektiboak eta indibidualak. Baina, bene-benetan, bere errotik sentitzen zuen, pentsatzen zuen itotzen gaituen gizarte hau aldatu eta libre, euskaldun, sozialista bat eraiki beharrean gaudela. 

Bakarrik sentitu omen izan da Anjel, azken sasoietan. Hala esan dosku familiak, eta hala esan omen du berak ere. Ikas dezagun horretatik, babes dezagun gure burua, maita gaitezen beharra dugunean, hitz egin dezagun, tartea hartu beste barik egoteko, filosofatzeko, batera izateko, kide sentitzeko.

Ez dugu ahaztu behar heriotza hau espetxe politika hiltzaile baten ondorio zuzena dela. Bere amama hil zuen espetxe politikaren ankerkeria berak areagotu zuen Anjelen gaixotasuna, zoritxarrez denok bildu gaituen egoerara eraman duen arte. 

Betira arte Anjel. Maite zaitugu.

Elkartasuna Urduliztik. Mila esker bihotz-bihotzez!

Ikusi argazkiak

Arratsaldeko 6etan zabalduko dute Anjel Figueroaren hil kapera

Anjel Figueroaren heriotzaren salaketa (argazki bilduma)

Arratsaldeko 6etan irekiko dute Anjel Figueroa Fernandez euskal preso politiko gaixoaren hil kapera, Algortako Etorbideko 69. zenbakian dagoen Sarria beilatokian. Gaueko 9ak arte egongo da zabalik. 20:00etan, berriz, kontzentrazio isila izango da Telletxe plazan, Algortako herritarrek deituta. Iruñean ere elkarretaratzea deitu dute, "Espetxe politikak hil egiten du. Gaixo dauden presoak kalera orain!" lelopean. Hitzordua 20:30ean jarri dute PPren egoitzaren aurrean. Bitartean, espetxe politikaren kontrako zein Anjelen aldeko pintaketez, kartelez eta dolu-xingola beltzadun ikurrinez agertu da goizetik Algorta. Gainera, hainbat eragilek gaurko aurreikusita zeuzkaten ekitaldiak bertan behera utzi dituzte, tartean Uribe Kostako EH Bilduk, Getxoko Bilduk eta Algortako Gazte Asanbladak. 

Atzo 14:30 aldera hilik aurkitu zuten Anjel Figueroa Fernandez euskal preso politikoa bere etxean. Algortarra espetxeratze arinduan zuten preso, epilepsia bezalako gaixotasun larria pairatzen baitzuen. 41 urte zituen soilik eta preso eman du ia bizi erdia, 1994an atxilotu zutenetik.

Anjel, agur eta ohore!
Preso gaixoak libre orain!

Anjel Figueroaren heriotza salatzeko kontzentrazio isila izango da gaur Algortan

Argazkian, Anjel Figueroa Txagorritxu ospitalean.

Ostegun honetan, 14:30 aldera hilik aurkitu dute Anjel Figueroa Fernandez euskal preso politikoa bere etxean. Algortarra espetxeratze arinduan zuten preso, epilepsia bezalako gaixotasun larria pairatzen baitzuen. 41 urte zituen soilik eta preso eman du ia bizi erdia, 1994an atxilotu zutenetik. Sakabanaketaren krudelkeriak ere gogor astindu zuen Anjel eta bere familia. Bere amama, Antonia Hernandez Rodriguez, 1997ko martxoaren 14an hil zen auto istripu batean Alcala-Meco espetxera bidean, bere biloba bisitatzera zihoanean. 

Mina eta haserrea eragin du Anjelen heriotzak. Etxerat presoen senideen elkarteak, Herrira mugimenduak eta Sortu alderdiak doluminak adierazi dizkiete presoaren senideei. Euskal preso politikoen aurka erabiltzen den espetxe politika krudelak hil egiten duela ohartarazi dute Herrirak eta Sortuk; Figueroa dela horren azken froga. Hortaz, giza eskubideak oinarri izango dituen bidea abiatu dadila aldarrikatu dute. Espetxe politika zein Figueroaren heriotza salatzeko datozen egunetan egingo diren mobilizazioetan parte hartzeko deia egin du Sortuk. Besteak beste, gaur ostirala, kontzentrazio isila izango da, 20:00etan, Telletxe plazan, Algortako herriak deitua.

"Kitxu" maitasunez hartu dute ehunaka auzokidek

Iturria: cc-by Ukberri.net

Argazkian, "Kitxu" hiletatik ateratzen zutenean.

Iñaki Gonzalo Casal "Kitxu" preso politiko itzubaltzetarra "'Kitxu', maite zaitugu", "herria zurekin" edo "Gora Angelitaren semea" bezalako leloak entzun ditu gaur dozenaka aldiz, Angela Casal Tubet bere ama zenaren hiletara sartu eta atera dutenean. Izan ere, Itzubaltzetako Herrirak egindako deialdiari erantzunez, ehunaka lagun hurbildu dira Itzubaltzeta / Romoko San Jose elizaren albora, Gonzalori animoak eta berotasuna ematera. Barruan ere, barra-barra izan dira senide, lagun, lankide ohi eta auzokideak, komulgatzean presoa agurtzeko aukera izan dutenek. Auzokideek elizatik kanpo presoarekin egon ahal izatea eskatu diete ertzainei, baina horiek ez diete utzi. Hiletan, herriko apaizak salatu egin du Espetxeetako Zuzendaritzak ezarritako baldintza bidegabeak. Hiletaren ostean, Gonzalo eraman dutenean, ertzainek gogor oldartu dira zeramaten autora hurbildu diren auzokideen aurka. Borrak eta ilegalak diren borra luzagarriak erabil dituzte zenbait laguni kontusioak eragiten, tartean UKBERRI.NETeko argazkilariari. Jipoitutako auzokide batzuek egur makilez erantzun dute. Senideek zabaldu bezala, Gonzalok eskertu du jasotako elkartasuna. 

Kitxu eta bere senideei elkartasuna adieraztera deitu du Itzubaltzetako Herrirak

Iñaki Gonzalo Casal "Kitxu" preso politiko itzubaltzetarra Angela bere ama zenaren hiletara ekarriko dute bihar, astelehena. Elizkizunak 18:00etan izango dira Itzubaltzeta / Romoko San Jose elizan. Tokiko Herrira bilguneak ordu bete lehenago, 17:00etan, jarri du hitzordua Santa Eugenia plazan, une zail hauetan berari eta senideei babesa eta berotasuna adierazteko. 

 
Kitxu askatu!

Preso eta iheslariak herrira!

Amaren hiletarako ekarriko dute Kitxu

Hasierako plana "Kitxu" gaur Algortako tanatoriora ekartzea bazuten ere, atzo azken orduan Espetxe Zuzendaritzak planak aldatu zituen eta ez dute ekarri, Itzubaltzetako Herrira bilguneak zabaldu duenez. Senideen arabera, gaur Basaurira hurbildu eta astelehenean hileta elizkizunetan izango da Iñaki. Hileta arratsaldeko 6etan izango da Itzubaltzeta / Romoko San Jose elizan.

Gauzak horrela, gaur goizean senideak, gertukoak, lagunak eta auzokideak izan dira Angelitari azken agurrak emateko, lehenengo Algortako tanatorioan eta Derioko hilerriko errausketa-plantan ondoren. Senideek Angelak azken 16 hileotan izan duen jarrera goraipatu eta guztiontzat eredugarria izan dela azpimarratu dute. Era berean, gaixo izan den bitartean hartutako berotasuna eta laguntza eskertu dute.

Agurrik ez, Angelita, gero arte baizik.

Kitxu Algortara ekarriko dute

Ostegun gauean hil zen Angela Casal Tubet Iñaki Gonzalo Casal "Kitxu" euskal preso politikoaren ama, gaixotasun luze baten ondorioz. Hain zuzen ere, gaur, larunbata, Algortako Etorbideko 69 zenbakiko (Txeli tabernatik gertu) Sarria tanatoriora ekarriko dute gatibu itzubaltzetarra, bertoko Herrira bilguneak jakinarazi duenez. Hartara, goizeko 8:30ean jarri dute hitzordua Kitxuri harrera egiteko, "une latz hauetan, lagun eta auzokideon elkartasun eta berotasuna sentitu dezan". Hileta elizkizunak astelehenean, abenduak 24, izango dira, 18:00etan, Itzubaltzeta / Romoko San Jose elizan. "18 urtez, Kitxuk pairatutako espetxe zigorraz gain, sakabanaketaren biktima izan da Angela. Zoritzarrez, semea ikusi gabe joan zaigu", salatu du Itzubaltzetako Herrirak. Gauzak horrela, une samin hauetan, senide eta gertuko guztiei babesa eta berotasuna adierazi die preso eta iheslari politikoen eskubideen aldeko eragileak; eta horrela jokatzera deitu ditu herritar guztiak.

Agurrik ez, Angelita, gero arte baizik.

Kitxuren ama hil egin da

Argazkian, azkeneko bisitan Iñaki Gonzalo Casal "Kitxu" eraman zuten kotxea, Ertzaintza bildutako auzokideen kontra oldartu baino lehen / cc-by Ukberri.net.

Gaur iluntzean hil egin da Iñaki Gonzalo Casal "Kitxu" preso politiko itzubaltzetarraren ama. Astelehen honetan, abenduak 24, egingo dituzte hileta elizkizunak. Hala ere, Itzubaltzetako Herrira bilguneak ezin izan du zehaztu oraindik zein ordutan izango diren. Seguruenik aipatu herriko San Jose elizan egingo dituzte. Larriki gaixo zegoen Kitxuren ama. Azken hamalau hilabetetan birritan ekarri izan dute gatibu itzubaltzetarra etxera, Villanublako (Valladolid) espetxetik, ama bisitatzera: bata 2011ko urriaren 14an eta bestea 2012ko martxoaren 21ean. Parot doktrina aplikatzen ez badiote, maiatzean da kalera irtetekoa Kitxu. Gaixotasunak, ordea, semea libre ikusi gabe eraman du ama. Litekeena da preso itzubaltzetarra hileta elizkizunetara ekartzea. 

Algortako Herrira bilguneak elkartasun eta berotasun osoa adierazi nahi dizkie Iñaki Gonzalo Casal "Kitxu" eta bere gertukoei, une samin hauetan.

Gero arte Anjelita!

Fernando Javier Blanco iheslari politikoa hil da

Argazkian, iheslarien aldeko aldarria Algortan / cc-by Ukberri.net

Fernando Javier Blanco iheslari politikoa hil zen irailaren 17an Kanbon, gaitz larri baten ondorioz, Etxerat elkarteak jakinarazi duenez. 70eko urteetan ihes egin zuen Iparraldera, eta Venezuelan ere bizi izan zen. Urriaren 23an, gaur, omenaldia egin dio iheslarien kolektiboak Biarritzen, gorpua erraustu aurretik.

Etxerat elkarteak bere babesa eta elkartasuna adierazi die Fernando Javier Blancoren senide eta lagunei. Eta era berean, horrelako egoerak errepika ez daitezen euskal errepresaliatu politikoek Euskal Herrian bizitzeko duten eskubidea aldarrikatu du.

Celestino Galan iheslari euskalduna hil da Venezuelan

Argazkian, iheslarien aldeko aldarria Algortan / cc-by Ukberri.net

Herrirak doluminak, babesa eta gertutasuna helarazi nahi dizkio Celestino Galan euskal iheslari politikoaren senide eta inguru afektibo osoari. Celestino Galan Venezuelako Carabobo Estatuan hil zen auto batek harrapatu ondoren. Jazoera iragan den irailaren 19an suertatu zen.

Celestino Galanek 53 urte zituen eta hiru hamarkada baino gehiago zeramatzan Euskal Herritik kanpo. Bilbotarra sortzez, bizitza erabat normala egiten zuen Venezuelan. Bertan lurperatua izan da eta adin txikiko seme bat uzten du.

Zoritxarrez, ez da euskal iheslari politiko baten heriotzaren berri dugun lehen aldia. Euskal Herriak hamarkada luzez bizi izan duen gatazka gogorraren ondorioa den errealitate baten aurrean gaude. Sorterritik milaka kilometrotara hiltzen diren iheslari politikoak.

Euskal jendarteak urtetako sufrimendua, mina eta gatazka atzean utzi eta bake eta konponbide agertoki bat eraikitzeko unea da. Bide horretan, ezinbestekoa izango da gatazkak eragindako ondorioak konpontzea, iheslari politikoen itzulera horietako bat izanik.