Iturria: Berria.info
Argazkian, Jaiki Hadi elkartearen agerraldia gaur, Bilbon.
Jaiki Hadi presoen prebentzio eta laguntzarako elkarteak biziki
gaitzetsi du Espainiako Auzitegi Nazionaleko Carmen Baena medikuak Iosu
Uribetxebarria preso gaisoaren osasun egoeraren inguruan osatutako
txostena. Euskal presoa oso larri dagoela berretsi duen arren, Baena
medikuak uste du Zaballako espetxean trata dezaketela.
Iñaki Uruburu eta Estibaliz Gorostiaga Jaiki Hadi elkarteko
ordezkariek agerraldia egin dute gaur, Bilbon; besteak beste.
Uribetxebarriaren gaixotasunaren jarraipena eta tratamendua preso
egotearekin "bateraezina" dela adierazi dute. Egoera salatzeko "dagokion
instantzia guztietan" kexak aurkezteko asmoa dutela esan dute. Auzi
medikuari espetxeetako irizpideak "alboratzea" egotzi diote,
Uribetxebarriaren kasuak baldintza guztiak betetzen dituelako, eta
ohartarazi dute baldintzapeko askatasunerako irizpideak "manipulatzen"
ari direla.
