EPPK-k baimena eskatu dio epaileari Lokarriren foroan parte hartzeko

EPPK Euskal Preso Politikoen Kolektiboak baiezkoa eman dio Lokarrik bere foroan parte hartzeko eskatuz igorritako gonbidapenari, Berria.info agerkariak zabaldu duenez. Hori dela eta, irteteko baimen berezia eskatu diete EPPK-ko mintzakideek (Xabier Alegria, Anabel Egues, Jon Olarra, Marixol Iparragirre, Lorentxa Gimon eta Mikel Albisu) Espainiako Auzitegi Nazionaleko Espetxe Zaintzako epaileari eta Frantziako Zigorren Aplikaziorako epaile zentralari, martxoaren 14an Iruñean eta 15ean Bilbon egingo diren bileretan parte hartu ahal izateko. Lokarrik eta Bake Bideak antolatuko duten foro horretan parte hartzea «nahitaezkoa» ikusten du EPPK-k, "bilkura beraren eta han jorratuko diren gaien garrantziagatik".
 

"Ekinaldi berritzaile eta inoiz egin gabekoa" jakinarazten du bertan presoen kolektiboak: "Gatazka Politikoaren Konponbiderako Foro Sozialean parte hartzeko erabakia". Bertan onartzen du foroaren antolatzaileek EPPK-ri gonbidapena igorri diotela, eta gonbidapen hori onartuz kolektiboaren mintzakidetzak foro horretan parte hartzea erabaki duela. Horretarako, antolatzaileei bidalitako gutunaren berri ematen dute. "Gatazka politikoa eta zehazki bere ondorioak konponbidean jartzeko egiten ari zareten ahalegina aitortzera gatozkizue", diote foroaren antolatzaileei igorritako gutunean. "Frantzia eta Espainiaren jokabide oztopatzaile eta arduragabekoa kontuan hartuta", EPPK-k bere eskuetan dagoen guztia egingo duela dio "konponbide politiko integralaren mesedetan".

Lokarri-rekin bildu dira euskal presoen mintzakideen bitartekariak

Iturria: Berria.info

Argazkian, EPPKren ordezkariak eta Lokarri-koak gaur, Bilbon. / Jon Hernaez, ARP

Euskal Herriko alderdi eta gizarte eragile nagusiekin bilera txanda hasi dute.

Paul Rios Lokarri-ko koordinatzailea eta Arantza Zulueta, Mitxel Sarasketa eta Kandido Zubikarai EPPK Euskal Preso Politikoen Kolektiboaren mintzaideen bitartekariak izan dira Bilboko bileran. Gatazkaren konponbidean, euskal presoen auziaren korapiloa askatzea ezinbestekoa dela nabarmendu dute Zuluetak, Sarasketak eta Zubikaraik. Eta zentzu horretan uste dute beharrezkoa dela berandu baino lehen presoei ezartzen dizkieten salbuespen neurriak indargabetzea eta sakabanaketa amaitzea.

Lokarrik “arretaz” entzun ditu presoen bitartekarien proposamen eta aldarrikapenak. Riosek esan duenez, “presoen giza eskubideak defendatzen dituzten ekimen eraikitzaile guztiekiko babesa agertzen jarraituko du Lokarri-k”. Gaineratu du berriz ere bilduko dela bitartekariekin, “uste baitugu presoen eta gizartearen arteko elkarrizketa eraikitzaile bat ezartzea beharrezkoa dela”.