Ekainaren 15ean denok Miarritzera!

"Herria gara arnas", Ernaik euskal iheslari politikoen inguruan egindako erreportaia

Euskal Iheslari eta Deportatu Politikoen Kolektiboak larunbat honetan, ekainak 15, Miarritzera hurbiltzeko deia luzatu du.

Kolektiboak hausnarketa prozesu zabala burutu du azken garaian eta estatuen blokeoa aldebakarreko pausuen bitartez gainditzeko hautua egin du. Bide horri hasiera eman nahi dio, eta hartarako abian jarri du “Herria dugu arnas” ekimena. Munduko bazter anitzetan ehunka iheslari daude, eta Euskal Herrian libre bizitzeko eskubidea jorratu nahi dute, mundutik herrira itzuli.

Haien babeserako eta Iheslari eta Deportatu Politikoen Kolektiboak gatazkaren konponbidean ekarpen politikoa egin dezan, Elkartasun Hatsa izeneko ekitaldia antolatu dute larunbaterako. Miarritzeko Irati erakustazokan izango da (aireportutik hurbil), eta egun osoko egitaraua antolatu dute:

• 11:30ean ekitaldi politikoa
• 13:30ean bazkari herrikoia
• 19:00etan kontzertuak: Gatibu, Gose, Iheskide eta Ze Esatek!

Hara hurbiltzeko, Uribe Kostatik bi autobus izango dira. Hauetako bat ekitaldia bukatu eta gero bueltatuko da (13:30ean). Bestea, berriz, kontzertuak bukatu eta gero bueltatuko da (23:00etan gutxi gora behera). Autobusa goizeko 9etan aterako da Telletxetik.

Izena emateko zerrenda jarriko da Abian Kultur Elkartean bihartik aurrera

Iheslariek jaso dezatela gure babesa!

Galiziako Curtis eta Bonxe espetxeetara zihoazen lau euskal preso politikoren senide eta lagunek istripu bat izan dute

Ostiralean, 20:30 inguruan, beste ehunka senide bezala, Zigor Blancoren neskalaguna, Josu Amantesen lagun bat, Jesus Gomezen lagun bat eta Txomin Troitiñoren lagun bat bidaiatzen ari ziren, euren gertukoak Curtis (A Coruña) eta Bonxe (Lugo) espetxeetan bisitatu ahal izateko. Leongo Astorga autopistan zihoazela txakur handi bat gurutzatu zitzaien errepidean, eta eurek gelditzen saiatu ziren, baina, ezin izan zuten saihestu eta bere aurka kolpatu ziren. Autoan zihoazen lau pertsonek ez zuten minik hartu, baina, kotxeak kalte materialak izan zituen. Istripua izan zuten lekura Guardia Zibila joan zen parte egiteko; baina, partea egin ostean, ordubete inguruz bertan izan zituzten paperak eskatuz, eta autoan zeramaten guztia (presoentzat ziren paketeak barne) goiti-behera miatzeko. Ondoren, bidaiaren jarraitu ahal izan zuten, eta larunbatean bisitak egin ahal izan zituzten euren senide eta lagunekin. 

Euskal presoak Euskal Herriko lantokietara ekartzea aldarrikatuko dute bihar Algortan

Argazkian, LABek maiatzaren 3an Algortan egindako kontzentrazioa / cc-by Ukberri.net

"Euskal presoak Euskal Herrira! Euskal presoak lantokietara!" lelopean, elkarretaratzea deitu du ostiral honetarako, ekainak 7, Eskumaldeko LABek. Hitzordua Algortako Telletxe plazan jarri dute sindikatuko kideek, eguerdiko 13:00etan. Txorierri, Mungialdea eta Uribe Kosta hartzen duen Eskumaldeko LAB sindikatuak hilabetean behin egiten du kontzentrazioa Ipar Uribe eskualde handian, beti lehenengo ostiralean. Baina, eguerdikoa ez da egunean zehar Telletxen egingo duten errepresaliatu politikoen aldeko mobilizazio bakarra izango. Ohiko lez, Algortako Herrira bilguneak deituta, 20:00etan preso eta iheslarien aldeko kontzentrazioa izango da plazan.

Arkaitz Goikoetxea eta Maialen Zuazoren gurasoak jazarri dituzte

Maiatzeko azken ostiralean jakin ahal izan genuenez, Arkaitz Goikoetxea Basabe preso politiko getxoztarraren ama autobusa hartzera zihoanean erretenitu egin zuen Espainiako Poliziak, Villenako espetxetik (Alacant) semea bisitatzetik bueltan. Ondoren, komisariara eraman zuten eta bere gauzak miatu ere egin zituzten. Bestalde, Arkaitzen neska Maialen Zuazo Aurrekoetxea bilbotarraren gurasoei bisitak ukatu dizkiete, Espainiako Auzitegi Nazionalaren errekurtso baten ondorioz. Maialen Brievako (Avila) kartzelan gatibu daukate.

Utzi bakean Arkaitz eta Maialenen senideak!

Euskal preso politikoak herrira!

Ongi etorri Oier! Zorionak Olga eta Txabi!

Oier, Olga eta Txabi (© Sopelako Herrira), a set by Algortako Herrira on Flickr.

Euskal preso eta iheslari politikoen egoerak ez du maiatzean ere hobera egin; gobernuek geldi diraute, beraien betiko posiziotik mugitu gabe, espetxe politika krudel eta hiltzaileak aplikatzen jarraituz.

Imajinatu haurdunaldia espetxean pasatzea zer izan daitekeen. Beharrezko arretarik gabe, kartzelarien oztopoei etengabe aurre egiten. Eta hori gutxi balitz bezala, imajinatu orain haurra jaiotakoan zuregandik eta aitarengandik banatzeko mehatxua egiten dizutela, Euskal Preso Politikoen Kolektibotik irtetea onartzen ez baduzu. Hori da Olga Sanz preso politiko sopeloztarrak jasan izan duen xantaia, eta hemendik gure elkartasun guztia helarazi nahi diogu.

Eta noski, zorionak ere eman nahi dizkiegu Olga eta Txabiri, Oier txikiak guraso bihurtu dituelako jada. 

Zorionak hiruroi, familia!

Ekainaren 10ean amaituko da epea Noraizanean ekimenean parte hartzeko

Argazkian, Pol Asensio preso ohia Abian kultur elkartean, bere argazkia kentzen.

Algortako Abian kultur elkarteak Noraizanean izeneko kultur sormen herritarreko ekimena abiatu zuen pasa den maiatzaren 10ean. Antolatzaileek azaldu zutenez, kultur ekimenak kalea, Abian bera eta kartzelak hitzez zein argazkiz komunikatzea du xede. Abiango kideek adierazi bezala, Noraizanean ekimen kolektiboa da, edonori zabaldua. Parte hartu nahi dutenek, ipuin edo kontaketa idatzi edo argazkiak atera eta eduki horiek espetxeetara bidaliko dituzte bertan Noraizanean ekimenean parte hartu nahi duten presoek segida eman diezaieten. Argazkien kasuan, eta espetxeak baldintzatuta, argazkian oinarrituriko testua idatzi ahal izango dute. Gaia irekia izango da eta parte-hartzea, sorkuntza, elkarlana, elkar ezagutza eta lan guztiak Abian kultur elkartearen urteurrenean ikusgai izatea izango dira sariak. lan guztiak Creative Commons lizentzia askea izango dute, zehazki aitortu-berdin partekatu (cc-by-sa). Esperientzia hasteko, lanak Abian bertan utzi edo abianagenda[abildua]gmail.com posta elektronikora bidali ahal izango dira datorren astelehenera arte. Ondoren, kartzeletara bidaliko dituzte lanak.

Laster etxera ekarriko ditugu guztiak!

Pol Asensiori harrera Algortan, a set by Algortako Herrira on Flickr.

Plazara! ekimena Algortan, a set by Algortako Herrira on Flickr.

Ongi etorria Paul Asensiori, a set on Flickr. (cc-by Ukberri.net)

Maiatza elkartasunez beteriko hilabetea izan da Algortan. Elkartasun Eguna eta Plazara! ekimena aukera paregabeak izan dira kalera irten eta nola edo hala preso, iheslari eta baita senideekiko geure konpromisoa berresteko. Ehunaka kilometrotara daudenak publikoki gogoratu eta euren egoera salatu dugu, eta senideek egin beharreko distantzia luzeak eta baldintza kaskarrak ere presente izan ditugu. Beraientzat gure besarkadarik beroena.

Ondokoaren tokian jarriz gainera, eta espetxe politikak iluntzen dituen zeruak pixka bat argitzeko asmoz, kartzeletara ehunaka gutun bidaltzea ere lortu dugu.

Aupa zuek! Jarrai dezatela lanak eta borrokak! Laster etxera ekarriko ditugu! 

Berri paregabeak ere izan ditugu hilabete honetan. Maiatzaren 16tik dago kalean Pol Asensio gure herrikide eta laguna; eta harrera bero bezain martxosoa egin ahal izan genion egunean bertan Orkestraren doinura! Orain bi zapatu ere ongi etorri ofiziala eman genion bazkari eta guzti eta hirugarren aldiz eta nekatzen ez garelako diogu: 

Ongi etorri Pol!