Iturria: Bilboko Branka
Jose Luis Castro Espetxe Zaintzako epaileak ostegunean,
Uribetxebarria baldintzapean aske geratuko zela aurreratu zuen
Espainiako Zigor Kodearen 92. artikulua aplikatuko zaiolako, presoak
gaixotasun larri eta sendaezina duela argudiatuz. Hala ere, fiskalak
presoa aske uzteko helegitea jar dezake ostegunerarte eta ondorioz, Herrirak eguneroko mobilizazioekin jarraitzeko erabakia hartu du eta beste behin. Jendea Bilboko Gobernu ordezkaritzaren aurrera gerturatu da eguerdiko 12:00etan.
Bertan, Beñat Zarrabeitiak, Herrira mugimenduko kideak azaldu du,
larunbateko manifestazioak “garrantzi handia” izan zuela, milaka eta
milaka lagunek Uribetxebarria eta gainontzeko preso gaixo larrien
askatasuna exijitu zutelako, “azken hilabetean sortutako olatuari segida
emanez”. Era berean, gogora ekarri du, olatu horren baitan egin diren protesta guztietan “konponbide nahia, bakea eta giza eskubideen aldarria oso presente” egon direla.
Komunikabideei zabaldu die gaurkoan, aurreko ostegunean Castro epaileak hartutako erabakiaren “berehalako aplikazio
praktikoa eskatzen dutela”, erabakia aplikatzeak “garrantzi handia
duelako Uribetxebarriaren osasun egoerak horrela eskatzen duelako;
itxaronaldia luzatzea bere osasun egoerarentzat kaltegarria delako eta
egoera hau errepika ezina delako”. Beraz, Zarrabeitiak Herrira
mugimenduaren izenean Espainiako Gobernuari “mekanismoak abiaraztea”
eskatu dio, gaixo dauden gainontzeko 13 preso politikoekin berdina
gertatu ez dadin.
Guzti horregatik, osteguna bitartean, bai Donostia Ospitalean zein
Gasteiz eta Bilbon mobilizazioekin jarraituko dutela argitu du. Donostia
Ospitaleko elkarretaratzeak 11:00etan izango dira eta Bilbo eta
Gasteizekoak 12:00etan.
Antonio Basagoitiren adierazpenei emandako erantzuna
Atzo bertan, Antonio Basagoiti PPko ordezkariak jakitera eman zuen
“berdin zaiela gaixo dauden preso politikoen egoera”. Horren aurren
Zarrabeitiak gehitu nahi izan du, Herrira mugimenduaren ustetan, “adierazpen horiek berez deskalifikatu”
egiten direla eta Euskal Herrian bi jarrera nagusitu direla egun. Alde
batetik “gehiengo zabal batek defendatzen duena, hau da, konponbidearen
aldekoa, giza eskubide guztien errespetuaren aldekoa eta espetxe
politikaren aldaketa beharrezkoa eta ezinbestekoa dela ikusten dugunona
eta bestetik; gatazkaren klabeetan gatazkari giltzatuta dauden
jarrerak”. Beraz, atzo Basagoitik esandakoak “gatazkari giltzatuta
daudela eta giza eskubideei mespresu egiten dietela adierazi du eta
euskal jendartearen “gehiengo zabal batek ez dituela haintzat hartzen
edota arbuiatu” egiten dituela.
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.