Maiatzaren 18an herri, hiri eta auzoetako plazak betetzeko deia egin du Herrirak

Argazkian, joan den larunbateko agerraldia Bilbon.

Herrira mugimenduak euskal preso politikoei aplikatzen zaizkien salbuespen neurrien aurkako eta konponbidearen aldeko ekimen berria aurkeztu zuen larunbatean Bilboko Casillan. Bertan, Ibon Meñikak eta Estitxu Garaik azaldu zuten gisara, datorren maiatzaren 18an Euskal Herri osoko hiri, herri eta auzotako plazak presoen eskubideen aldeko aldarriaz zipriztintzera deitu du Herrirak.

Egun lanean 200 Herrira Bilguneak izango dira mobilizazio hauen deitzaileak, tokian tokiko ekimenak abiaraziz. Espainiako Gobernuak presoen auzian eta orokorrean bake eta konponbide prozesuan ezarri nahi duen blokeoaren aurrean, Herriraren ustez ezinbestekoa da herritarrek protagonismoa hartu eta mobilizazioa eta elkarlanaren bidez aukera berriak sortzea.

Euskal geografia osoan ez ezik, Herriraren asmoa, maiatzaren 18an mundu zabaleko hainbat txokotan euskal presoen eskubideen aldeko eskakizuna presente egotea da. Hurrengo egun eta asteetan deialdi hauek indartzeko kanpaina integrala egingo du Herrirak, baina gaurdanik maiatzaren 18ko mobilizazioetan parte hartzeko gonbitea luzatzen dugu.