Gobernuaren planaren aurrean gogoeta egin du Herrirak

Argazkian, apirileko azken ostiraleko kontzentrazioa Algortan.

Ezer baino lehen, argi dugu Gobernuaren aldetik datozen mugimendu eta adierazpenak euskal gizartearen borondatearen eta mobilizazioaren emaitza direla. Espainiako Gobernuak modu batera edo bestera mugitu beharra du euskal preso politikoei dagokionez, Euskal Herrian egoera hau mantentzea esplikaezina delako gaur gaurkoz. Euskal gizartearen gehiengoa euskal preso politikoen eskubideak errespetatzearen alde dago. Horren erakusle dira azken hilabeteotan preso eskubideen alde burutzen ari diren mobilizazio jendetsua.. Zentzu honetan, Gobernua urrats egokiak ematera bultzatzera behartzeko beharrezkoa izango da herritarren aktibazioa eta mobilizazioa aurrerantzean ere. 

Gobernuak mugitzen ari dela erakutsi nahi du, mugitu gabe. Gobernuaren plan berriak betiko gabezia nabarmenak dituela uste du Herrirak. Euskal preso politikoen Giza Eskubideen errespetua bestelako baldintza eta eztabaidekin nahastea ez dugu egokia ikusten. Giza Eskubideen urraketa larriak ematen dira Espainiako eta Frantziako espetxeetan, eta honekin amaitzea beharrezkoa da egoerak okerrera egin aurretik. Gaixotasun larriak dituzten presoak askatzea, Bizi Osorako zigorraren derogazioa eta sakabanaketaren amaitzea gizabidezko eskaerak direla uste dugu, Euskal Herrian gehiengo zabal batek babestuak. Giza eskubideei ezin zaizkie muga politikoak ezarri. Giza Eskubideak errespetatzeko dira.

Behin Giza Eskubideen onarpena eman ondoren, konponbide prozesuaren baitan elkarrizketak abiatu beharko lirateke euskal preso eta iheslarien itzuleraz hitz egiteko. Benetako bake eta konponbide egoera batek gatazkaren ondorio guztien konponketa egoki bat eskatzen du, tartean preso eta iheslariei dagokiena.

Amaitzeko, mobilizazioaren garrantzia azpimarratuz, maiatzaren 19an plazak betetzeko proposamena luzatzen diegu herritarrei. Gizartea mugitzeak baitakar agintariak mugitzea. 

Eskerrik asko.

Herrira