Herrira mugimenduak euskal preso politikoen eskubideen alde maiatzaren 19an burutuko den Goazen Plazara! egitasmoa aurkeztu du
gaur goizean. Ekimenak hainbat lagunen atxikumendua jaso du eta besteak
beste, Amaia Zubiria, Irati Anda, Iñaki Olasolo eta Ines Osinagak parte
hartu dute aurkezpenean.
Jarduera eremu desberdinetan lanean diharduten pertsona askok bat egin dute gaur goizean Herrira mugimenduak maiatzaren 19rako antolatu duen Goazen Plazara! egitasmoaren aurkezpenean. Era horretan, euskal preso politikoen Giza Eskubideen alde hiri, auzo eta herrietako plazak betetzeko asmoa erakutsi dute eta egitasmoari babesa eman diote.
Ana Saez eta Manu Ugartemendia Herrira mugimenduko kideek agerraldian
azaldu dutenez, Goazen Plazara! egitasmoak euskal preso politikoen
eskubideen errespetua eskatzea izango du helburu, “garai berriotan
eskari horren zabaltasuna eta sendotasuna nabarmena” delako, baina
gogora ekarri dute ere, “gobernuak direla presoen eskubideak bermatzeko
urratsa beren eskuetan dutenak”. Beraz, urratsa eman dezaten eskatu
diete “jendarte gehiengoaren espektatibei eta bake prozesuaren premiei erantzun baikorra emanez”.
Gaurkoan ere, dispertsioaren ondorio larriak aipatu nahi izan dituzte
eta joan den asteburuan dispertsioaren ondorioz istripuak izan zituzten
senideei “babes eta animorik sentituena” helarazi diete.
Atxikimenduak
Atzoko egunean Herrirak Kirmen Uribe, Ramon Barea eta Gontzal
Mendibilen parte hartzea baieztatzen zuen bideoak kaleratu zituen eta
gaurkoan atxikimenduen zerrenda
aurkeztu dute. Agerraldian atzoko bideoak ikusteaz gain, Amaia Zubiria
abeslariaren eta Irati Anda eskalatzailearen testuak irakurri dira.
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.