Argazkian, presoen aldeko elkarretaratze bat Berangon / cc-by Ukberri.net
Martin Etxegarai Mendiguren 29 urteko preso
berangoztarra etxean da jada. Gaztea Almeriako kartzelatik zen ateratzekoa larunbat goizean,
bederatzi urteko espetxe zigorra osorik bete ostean. Hegazkina hartuta gaueko 11etan herrian espero zuten arren, garraioa galdu eta alokatutako autoa hartu behar izan zuen Albacetetik Madrileraino. Bertan abiatu zen Berangorantz hurbildutako lagun eta senideek lagunduta. Herrira igandeko ordu txikietan heldu zen bertokoen harrera beroa jasoz. Etxegarai 2002ko
maiatzaren 18an atxilotu zuen Ertzaintzak Berangoko postetxeari su eman
izana leporatuta. Berarekin batera, Orkatz Gallastegi gaztea ere hartu
zuten atxilo. Biek ala biek hasieratik ukatu egin zuten erasoa burutu
izana baina epaileak zigortu zituen, ezkutuan mantendu zen ustezko
lekuko baten hitzan oinarrituz. Bestalde, aipatutakoa ez da Etxegarairi
leporatu dioten kale eraso bakarra. Beste 15 gazte bizkaitarri bezala,
2000ko irailaren 16an Galdakaon hainbat banketxe eraso izana egotzi
zioten Auzitegi Nazionaleko epaileek, baina bere aurka zantzurik ez
zegoela onartu zuten azkenean. Gazteen kontrako froga bakarrak
inkomunikazio aldian ertzainen aurrean egindako deklarazioak izan ziren,
"tortura dela medio" lortutakoak, akusatuek salatu zutenaren arabera.
Etxegaraik sakabanaketaren biktima izan da eta, besteak beste, Madrilgo
Soto del Real, Cadizko Puerto II, Zaragozako Zuera, Almeria eta
Albaceteko espetxeetan izan dute.
Ongi etorri Martin!
Preso eta iheslariak herrira!
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.