"Ni erahiltzea zela helburua pentsatu nuen, baina,
beraien 'partehartzerik' gabe". Honela amaitzen du Enara Rodrigezek atzo
jarritako salaketan agertzen den testigantza.
Enara
Rodriguez, Arkaitz Rodriguez euskal preso donostiarraren arreba da, eta
irailaren 28an bere anaia Logroñoko espetxean bisitatzetik zetorrela
egoera latz bat bizitzea egokitu zitzaion. Izan ere, bisitatik bueltan
zetorrela, Logroñotik Iruñera doan A-12 autobian, bere alboan zihoan
Opel Astra markako auto gris batek zuen jarrera arraroaz ohartu zen.
Berak abiadura azkartu ala moteldu arren, autoa momentu oro bere alboan
mantentzen baitzen. Bi gizonezko zihoazen autoan. Irteera baten parean,
auto hau Enararen autora gerturatzen hasi zen, bera errepidetik
ateratzeko asmoz. Azkenean, irteera hartu behar izan zuen, eta une
horretan autoaren kontrola galdu, eta 3 edo 4 buelta eman zituen, inongo
momentutan irauli ez zelarik.
Bertan geldirik zegoela, bi gizon autoaren inguruan zituela konturatu
zen. Gizonezkoetako batek iraindu egin zuen Enara, autotik jaisteko
esaten zion bitartean. Halako batean poliziaren plaka bat erakutsi zion
gizon hauetako batek, Polizia Nazionalarena zela iruditu zitzaiolarik,
eta berriz ere kotxetik jaisteko esan zion. Bost minutu inguruz egoera
horretan egon ondoren, Enarak leihatila jaistea erabaki zuen, eta hau
baliatuz bere alboan zegoen gizonezkoak atea ireki eta iletik tiraka
atera zuten autotik. Irain eta mehatxu artean lurrera bota zuen.
Etengabe irain sexistak entzun behar izan zituen, eta bera bortxatuko
zutela esanaz ere mehatxatu zuten. Momentu batean, lurretik altxatzea
lortu zuen eta polizia batek airean hartu zuen, eta eskumuturrak atzean
loturik bezala heldu zuen. Orduan, ukitzen hasi zitzaizkion, eta berriz
ere mehatxuak eta irainak entzun behar izan zituen. Berriro, lurrera
bota zuten. Enarak aurre egin zien eta ondorioz horrelako gauzak entzun
behar izan zituen: "como no te calles y dejes de insultarnos esta noche
tendremos algo que celebrar", "eres una zorra valiente, ya veremos
después de violarte si sigues igual"...
Azkenean,
lepotik eutsita lurretik altxa zuten, eta bost minutuz alde egiten
utziko ziotela esan zioten. Azkar joateko, zeren berriro aurkitzen
bazuten, ez zuela kontatu ahal izango esan zioten. Enara izugarrizko
abiadan abiatu zen, azkarregi zihoala konturatu zen arte. Eta horrela
jarraituz gero, beraiek nahi zutena lortuko zutela pentsatu zuen,
istripua izatea berak bere kabuz.
Nola
ulertu behar dugu gertaera hau? Nola ulertu behar du gizarteak? Enarak
jasan behar izan duen egoera bezalakoak are argiago erakusten du, euskal
preso politikoen senide eta lagunok jasan behar izaten dugun jazarpena.
Gu zigortzen gaituzte sakabanaketarekin, eta zigor hau betetzen ari
garenean, gaineratutako zigor, jazarpen eta tratu txar hauek jasan behar
izatea oso larria, larriegia iruditzen zaigu. Hau onartezina da eta
ezinbestekoa da hau ahalbidetzen duen sakabanaketarekin berehala
amaitzea, gure eta gure senideen eskubideengatik, eta baita gure
segurtasunagatik ere. Gainera, Enarak jarritako salaketaren
hariraezinbestekoa ikusten dugu zer gertatu den argitzea, eta honen
aurrean erantzunkizunak aurkitzea.
Gure senide eta lagun diren euskal preso politikoei salbuespeneko
espetxe politika bat aplikatzen zaie, baina guk geuk ere espetxe
politika hau jasan behar izaten dugu. Sakabanaketa da senide eta lagunok
sufritzen dugun zigorra. Sarri bidaia hauek egiteko baldintzak gogorrak
izaten dira: bisiten ordutegi desegokiak, senideok espero gabe gure
senide eta lagunen espetxetik espetxerako lekualdatzeak, eguraldia,
miaketak, gastu ekonomikoa... Eta baldintza hauek ondorio latzak izaten
dituzte, istripuak eta heriotzak direlarik gogorrenak. Bidaietan bizi
dugun tentsioak eta izaten dugun neke fisikoak hainbat istripu izatea
eragiten du, eta jada 16 senide eta lagunek galdu dute bizia
errepideetan. 2012. urtean hamabi istripu jasan dituztelarik senide eta
lagunek. Larriena Mikel Egibarren senideek abuztuan jasan zutena, eta
egun oraindik ondorio latzak jasaten ari direna.
Hala
ere, eta jada esan dugun bezala, guk gure senide eta lagunak maite
ditugu eta etxean nahi ditugu. Horregatik, eta guretzat eta eurentzat
beharrezkoa denez, gure senide eta lagunak bisitatzen jarraituko dugu.
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.