Argazkian, otsailaren 15ean 300 auzokidek baino
gehiagok salatu zuten Iñaki Gonzalo Casal "Kitxu" herriko preso
politikoari Parot Dotrina erabiliz espetxe zigorra luzatu izana / cc-by Ukberri.net.
"Zer da 197/2006 dotrina? Zer da Parot dotrina?
Zergatik luzatu nahi diote "Kitxu"-ri zigorra, 7 urte gehiago?". Galdera
horiei guzti horiei erantzun eman nahi die Itzubaltzetako Herrirak ostegun honetan, Branka kultur elkartean eskainiko duen bideo-forumaren
bitartez. Preso eta iheslari politikoen eskubideen aldeko bilguneak zabaldu duenez, hitzordua
arratsaldeko 8etan izango da. Estatu espainolak Iñaki Gonzalo Casal
"Kitxu" preso politiko itzubaltzetarrari 197/2006 edo Parot ezizenez ezaguna den dotrina aplikatu
zion hilaren 14an. Handik hona, hainbat mobilizazio izan dira herrian,
"Kitxu"-ren alde eta datorren martxoaren 20ari begira. Tartean, sinadura bilketa. Egun horretan,
Estrasburgon egoitza duen Europako Giza Eskubideen Auzitegiak aztertuko
du Ines del Rio preso politikoaren auzian Espainiak jarritako helegitea.
Lehenengo ebazpenean, Auzitegiak Tafallako presoa askatzea agindu zuen,
197/2006 dotrinak giza eskubideak urratzen dituelakoan.
Iñaki Gonzalo Casal "Kitxu" Getxo eta Egin
irratietako kazetari izandakoa, 1994ko urriaren 25ean atxilotu zuten
Areetako Bizkaiko Zubiko plazan, Andoni Muñoz urduliztarra, eta
Algortako Iñigo Otazua "Oti" zein Angel Figueroarekin batera. Lanbroa
komandoko kideak izatea leporatu zieten lauei, 30 urteko zigorra
ezarriz. Egun Valladolideko espetxean, 18 urte eta lau hilabete
daramatza preso. Irteera data 2013ko maiatzaren 4rako bazuen ere,
hilaren 14an luzatu zioten zigorra, beste zazpi urtez.
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.