Aulki hutsen samina irudikatzeko ikuskizun kartsu eta hunkigarria

Iturria: "Gara" egunkaria

Datorren urtarrilaren 12an burutuko den manifestazioari begira, ekitaldi sorta baten lehendabiziko kapitulua idatzi zuten atzo Gernikan euskal preso eta musikariek. Poesia eta doinuak ederki uztartu zituzten protagonistek oraindik ehunka ohe huts daudela gogoratzeko.

Agertoki horretan, ikuskizun ederra marraztu zuen Herrirak. Oso ederra. Zenbait preso politikoren poema eta gutunak euskal talde ezagunen saioekin uztartu zituzten, neurri ederrean. Ez zen ezer faltan bota, ez zen ezer soberan izan. Horren froga nabarmenena, gerturatukoen zirrara aurpegi disimulaezina. Malko batzuk agertu ziren baita, bikote baten begi ninietan, Mikel Antzak bere familiari bidalitako gutuna Gotzon Barandiaranek irakurri zuenean.

Atzoko ekitaldia, "Herrira Noa" izena izan zuena, atzotik datorren urtarrilera burutuko diren ekitaldi sortaren lehendabizikoa izan zen. Antolatzaileek argitu bezala, artisten izenak ez ziren aurretik aditzera eman, eta, hortaz, hauen agerpena ikusminez espero zen publikoan.

Euskal preso politikoen eskubideen aldeko ekimen kulturala jarriko da martxan igandean Gernikan

Bideoa ikusi eta zabaldu

Azaroaren 18an, “Herrira Noa” ekimen kulturalaren lehenengo hitzordua izango da Gernikan. Euskal eszena musikaleko hainbat izen oso ezagun bertan izango dira Jai Alai Pilotalekuan 18:00etatik aurrera. "Herrira noa" ekimen kulturala babestu eta urtarrilaren 12an Bilbon egingo den Herri Mobilizazio Orokorrean parte hartzeko deia egin asmoz, Gernikako hainbat musikari eta lagunek Kortaturen "Sarri, Sarri" abesti mitikoaren bertsio berezia osatu dute. Gogoratu behar da, Joseba Sarrionandia idazle iurretarrak urtarrilaren 12ko Herri Mobilizazio Orokorra abiarazteko lehen ekarpena egin zuela. Kanpaina ekarpen sektorial eta indibidualez osatua egongo da eta hona hemen Gernikako musikariek, hainbat lagunen parte hartzearekin egin duten lana.

Elkartasun zozketak baditu irabazleak. Zorionak!

Gernikako urriko azken astelehenean egin zuten atzo 2012ko elkartasun zozketa. Mercedes furgoneta 90.067 zenbakia erosi zuen lagunak irabazi du. Horrek abenduaren 26ra arte (20:00ak arteko epean) izango du saria jasotzeko. Agertuko ez balitz, ordezko zenbakia, 101.994, duen pertsonak eskuratuko luke. Tablet-ari dagokionez, 41.846 zenbakia suertatu da irabazle eta ordezko zenbakia 55.888 da.

Zorionak irabazleei!