Gose greba amaitzea erabaki dute preso kurduek 68 egunen ostean, Öcalanen eskariz

Bideoa ikusi eta zabaldu

688 preso kurduk Abdulá Öcalan Kurdistango Langileen Alderdiko (PPK) liderraren mezuari men egin egin eta gose greba uztea erabaki dute, 68 egunen ostean. Protesta amaitzean, hainbat ospitalera eraman behar izan dituzte, ondorengo bideoan ikus daitekeen bezala.

Kurduen gose grebak 62. eguna bete du preso politikoak direla aldarrikatuz

Iturria: Argia.com

Argazkian, gose grebalarien aldeko manifestazio bat Kurdistanen.

Gose greban dira 10.000 preso kurdu baino gehiago, eta protesta hasi zuten ehun inguruek 62. eguna bete dute asteartean. Irlanda Iparraldeko gose grebalarien sinbolo den Bobby Sands 66 egunen buruan hil zen, eta batzuek kezka agertu dute lehen heriotzak aste honetan gerta ote litezkeen. Egoera larria dela salatu du Amnesty Internationalek, besteak beste. Nazioartean protesta ugari egiten ari dira egunotan, eta atzo Bilbon Askapenak deituta kontzentrazioa egin zuten.

Datu zehatzak jakitea zaila den arren, zenbait webgune kurdutan adierazi dute irailaren 12an 65 presok hasi zutela gose greba, eta horri pixkana beste kartzelatako PKKko eta PAJKeko militanteak gehitu zitzaizkiola. Azaroaren 5ean, 683 preso politikok gose greban 55 egun bete zituztenean, 10.000 preso politiko gehiago batu ziren grebara. BDP alderdi kurduko sei legebiltzarkidek eta Amed hiriburuko alkateak ere bat egin dute baraualdiarekin.

Turkiako espetxeetan gose greban diren preso politiko kurduei elkartasuna erakutsi die Herrirak

Herrira mugimenduak bere kezka eta ezinegona adierazi nahi du Turkiako espetxeetan gose greban aurkitzen diren preso politiko kurduen egoera dela eta. Gatazka politikoaren ondorioz espetxean aurkitzen diren 1.000 lagun inguru gose greban aurkitzen dira une honetan Turkiako espetxeetan. 

63 presok irailaren 12an ekin zioten gose grebari, eta hauetako batzuk egoera larrian aurkitzen dira une honetan. Ondoren preso gehiago batzen joan dira protestaldira. 

Besteak beste, Abdullah Öcalan preso eta buruzagi politikoa libre uztea aldarrikatzen dute, baita beraien hizkuntza erabiltzeko eskubidea ere.