Hainbat preso ohiek deitzen dute azaroaren 10eko manifara joateko

Hogeita hamar bat preso ohiek azaroaren 10eko manifara joateko deitzen dute, preso eta iheslarien giza eskubideen alde.

Hor dituzue izenpetu duten preso ohiek eta deialdiaren testua:

Kristiane ETXALUZ, Saroia GALARRAGA, Filipe LESGOURGUES, Filipe LASCARAY, Muriel LUCANTIS, Gabi MOUESCA, Imanol JAIO, Maite ETXEBERRIA, Claude RECART, Bixente GARZIA, Pantxika MARHUENDA, Peio IRIONDO, Roberto MURGIONDO, Eloi URIARTE, Pilar ARTZE, Mattin ETCHEPARE, Mari Karmen ALDAYA, Itziar IMATZ, Pello ALCANTARILLA, Joseba AGUIRREBARRENA, Oskar BIZKAI, Filipe LESGOURGUES, Filipe BIDART, Jose Antonio CAU, Arantxa SASIAIN, Kristina LARRAÑAGA, Philippe LASSALE-ASTIS, Esnal Arrate URREISTI, Xan KOSKARAT.

” Euskal Herriaren askatasun nazional zein sozialaren aldeko mugimenduetan, gure engaiamenduaren ondorioz presondegitik pasa giren Euskal Herritarrok, Euskal Herriko gatazkaren konponbidearen alde abian den prozesuari gure babes eta atxikimendu osoa adierazten diogu.

Gatazkaren konponbide honek ezingo ditu alde batera utzi gatazka beraren ondorioak, izan dadin presoena edo iheslari politikoena. Hola gertatu izan da Euskal Herriko gatazkaren erro edo arrazoin berdintsuak dituzten beste hainbat bake prozesuetan ere.

Horregatik, lehen bait lehen, preso politikoen askatzea eta iheslari politikoen itzultzea ezinbesteko eta beharrezkotzat jotzen dugu. Zentzu honetan, Azaroaren 10 ean Baionan iraganen den manifestaldiak garrantzi haundia duela diogu. Gatazkaren konponbidearen alde eta HERRIRA mugimenduak eramango dituen aldarrikapenekin- aldaketaren alde diren behatzaile eta eragile guzien iritziz zentzuzkoak direnak- bat egiten duten herritarrak biltzea du helburu manifestaldi honek.

Bakea eta justizia lortzeko « zentzuzkoak » diren elementuak hauek dira:

-Larriki eri diren presoen askatzea. Ezin onartua da preso atxiki ditzaten eritasun larriak dituzten edo bizi iraupena mugatua duten gizon-emazteak. Pertsona hauen preso atxikitzea moralki onartezina izateaz gain legez-kanpokoa da, Frantzian, Espainian eta baita Europan ere.

-Euskal Preso Politikoen Kolektiboaren batzea Euskal Herrian : beraien engaiamendu politikoaren ondorioz gatazkaren eragile izan diren eta Euskal Preso Politikoen Kolektiboa osatzen duten gizon emazteei gatazkaren konponbidean eragile izatea dagokie gaur egun. Funtsezkoa dela deritzogu. Horregatik, abian den bake prozesu honetan ezinbestekoa den eragileen parte hartzea ahalbideratuko lukeen neurria litzateke Euskal Preso Politikoen batzea Euskal Herrian.

-Bizi osoko kondenera daramaten neurrien deuseztatzea(Parot doktrina deiturikoa). Estatuen jokabide basati zein mendekuzkoaren isla diren eta askatasunaren murrizketak dakartzaten neurriak deuseztatzeko garaia da. Neurri hauek, pertsonak suntsitzea eta deuseztatzeaz gain heriotz kondena dakarte.

-Sakabanaketa eta isolamendu egoerak ahalbideratzen dituzten salbuespeneko neurrien deuseztatzea. Euskal militanteen sakabanaketak, hau ere legez-kanpokoa, presoa eta bere familiari bizi baldintza txarrak inposatzeaz gain askatasun murrizketari sufrimendu bat gehitzen diete. 

 Aplikapen hau aldatu behar da eta gaur egungo kontestu politiko berriak presondegietako baldintzen hobetzea ekarri beharko luke.

-Kondenen aplikazioei loturiko neurriak : (baldintzapeko askatasuna) kondenen aplikazioari loturiko neurriak ez dira pribilegioak, legeak ahalbideratzen dituenak baizik, Europako autoritateek Estatuak horretara bultzatzen dituztelarik. Neurri hauen aplikazioak Euskal Preso Politikoen kopuru haundi baten askatzea ekarriko luke (borondatearen araberakoa).

-Euskal Iheslari Politikoen jazarpenarekin gelditzea :hainbat militantek, jazarpenak, mehatsuak, bahiketa, tortura eta hilketak jasanik, osatzen duten Kolektiboak Euskal Herrian aske bizi eta lan egiteko eskubidea aldarrikatzen dugu, beraien eskubide guzien jabe izanik eta gatazkaren konponbidean eragile eta parte hartzaile izaiteko gisan.

« Zentzuzkoak » diren aldarrikapen hauekin, baina baita ere Estatu Frantsesari bere legearen normalizazioa eta aplikapena galdetuz, gizarteari dei egiten diogu azaroaren 10 ean Baionan iraganen den manifestaldian parte hartzera (Euskaldunen plazatik abiatzea 15h30etan ttanko!).

Irekitzen ari den lehio honetaz jabetuz, Euskal Herrian bake eta justizia lortzeko aukerak hurbilduz, dei honen bidez aintzinera egiteko gure nahia adierazi nahi dugu, elkarrizketa eta gehiengoaren parte hartzea bultzatuz.”

Azaroaren 10ean, denok Baionara! Arratsaldeko 3.30tan ttanko; Euskaldunen plazatik.

Hurbildu bakera, giza eskubide guztiak, euskal presoak Euskal Herrira!