Argazkian, otsailaren 15ean, 300 auzokidek baino
gehiagok salatu zuten manifestazioan "Kitxu"ri espetxe zigorra luzatu
izana / cc-by Ukberri.net
Algortan kontzentrazio bana izango da: bata, 13:00etan, Eskumaldeko LABek deituta; eta bestea, 20:00etan, Algortako Herrira bilgunean deituta. Biak ala biak Telletxe plazan.
Bihar, martxoak 20, Europako Giza Eskubideen
Auzitegiko Areto Nagusiak Ines del Rio euskal preso politikoaren auzia
berraztertuko du. 2012ko uztailaren 12an Estrasburgoko auzitegiak giza
eskubideen aurkakotzat jo zuen gatibu tafallarrari 197/2006 edo Parot
ezizenez ezaguna den dotrina ezarri izana. Askatu beharrean, helegitea
jarri zuen Espainiako Gobernuak. Del Riori buruz hartuko den erabakiak
beste 73 euskal preso politikarengan eragina izango du, tartean Iñaki Gonzalo Casal "Kitxu" itzubaltzetarrarengan. Horren harira, joan den larunbatean, 1.500 lagun inguruk egin zuten manifestazioa Tafallan, Herrira mugimenduak
zabaldu duenez. Bihar, asteazkenarekin, berriz, mobilizazioak izango
dira Euskal Herri osoan: besteak beste, bina kontzentrazio izango dira
goizez eskualdean: bata, 11:15ean, Itzubaltzetako Artatza-Romo
institutuaren aurrean; eta bestea, 13:00etan, Algortako Telletxe plazan,
Eskumaldeko LABek deituta. Arratsaldeari dagokionez, 19:00etan,
Sopelako udaletxeko plazan egingo dute elkarretaratzea. Eta 20:00etan,
Algortako Telletxe plazan, Plentziako Pirulin eta Urdulizko geltoki
ondoan. Azkenik, Itzubaltzeta / Romon manifestazioa egingo dute
iluntzeko 8etan, Santa Eugenia plazatik abiatuta.
Bitartean, abian da
Iñaki Gonzalo Casal "Kitxu" preso politiko itzubaltzetarrari 197/2006
edo Parot ezizenez ezaguna den dotrina aplikatu izana salatu eta bere
askatasuna eskatzeko sinadura bilketa,
gaia Getxoko Udalbatzak eztabaidatu dezan. Itzubaltzeta / Romoko Branka
herriko tabernan eta egungo Itzubaltzeta gaztetxean (etxe merkeak) ez
ezik, Algortako Amnistia tabernan eta Abian kultur elkartean ere egongo
da sinatzeko aukera. Bestalde, "Kitxu"-ri postal edo gutunen bat
idaztera animatu ditu herritarrak Itzubaltzetako Herrirak. "Orain bizi duen egoera kaxkarrean, bere bizipoza hein handi batean gure esku dago", adierazi dutenez.
Iñaki Gonzalo Casal "Kitxu" Getxo eta Egin irratietako kazetari
izandakoa, 1994ko urriaren 25ean atxilotu zuten Areetako Bizkaiko Zubiko
plazan, Andoni Muñoz urduliztarra, eta Algortako Iñigo Otazua "Oti"
zein ostegunean zendutako Angel Figueroa
algortarrarekin batera. Lanbroa komandoko kideak izatea leporatu zieten
lauei, 30 urteko zigorra ezarriz. Egun Valladolideko espetxean, 18 urte
eta lau hilabete daramatza preso. Irteera data 2013ko maiatzaren 4rako
bazuen ere, hilaren 14an luzatu zioten zigorra, beste zazpi urtez.
Giza eskubideak, irtenbidea, bakea.
197/2006 doktrina eten!
0 iruzkin:
Iruzkin bat idatzi
Iruzkina bidali bezain pronto ez bada agertzen ez kezkatu. Ahalik eta lasterren argitaratuko dugu. Mila esker.