Arartekoak Uribetxebarriaren baldintzapeko askatasuna "ahalik eta gehien azkartu" dezaten eskatu du

Iñigo Lamarca Arartekoak, Espetxeetako Zuzendaritzari eta Espainiako Auzitegi Nazionaleko Espetxe Zaintzari eskatu dio Iosu Uribetxebarriaren "baldintzapeko askatasunari buruzko ebazpen azkarra bideratzeko izapideak ahalik eta gehien azkartu ditzaten". Presoak minbizia metastasiarekin pairatzen du eta Lamarcak "gose greba egitearen erabakia berrazter dezan" eskatu dio. 

Arartekoak egindako Adierazpen Instituzionalaren bidez "ETAren jarduera terroristarekin lotutako delituak egin izanagatik espetxean dauden pertsonen egoerari buruz" eta bereziki gaixo daudenei buruz mintzatu da. 

"Pertsona horiek egindako krimen eta delituak bereziki gaitzesgarri eta krudelak izan arren hainbat kasutan, Zuzenbideko Estatu demokratikoak bere nagusitasun moral handia erabili behar duela" adierazi du Lamarcak. 

Doktrina ezarri zaien presoak aske uztearen alde azaldu da Arartekoa

Iturria: Eitb.com

Espainiako Gobernuak eta auzitegiek Estrasburgoren epaia berehala ezarri beharko luketela uste du Iñigo Lamarca Arartekoak. Honen harira, Parot Doktrina berrikustearen alde azaldu da eta ondorioz, doktrina hori ezarri aurretik presoek zuten zigorra aplikatzea eskatu du Arartekoak Radio Euskadin.

Lamarca Europako Giza Eskubideen Auzitegiaren epaiaz mintzatu da, izan ere, Espainia zigortu du Parot doktrina ezartzeagatik eta 30.000 euroko kalte-ordaina eman beharko dio Ines del Rio Prada ETAko kide ohiari.

Lamarcaren iritziz, "Espainiari horrelako zigor gehiago" jar diezaiokete, eta "estatu demokratiko baten zilegitasunerako kaltegarri" izango litzakeela uste du. Halaber, "Estrasburgoko Auzitegiari helegitea jar diezaioketen arren, aho batez hartu den heinean, Gobernuaren errekurtsoak aurrera egiteko aukera gutxi ditu", esan du.

Espetxe politika aldatzea eskatu du Arartekoak

Argazkian, Arartekoarekin bildu dira gaur Etxerat elkarteko ordezkariak /  © Etxerat

Iñigo Lamarca Arartekoak 2011ko txostena aurkeztu du gaur eta, besteak beste, kartzela-politika aldatzea eskatu du, euskal presoen sakabanaketa amaitzeko eta gaixotasun larriak eta sendaezinak dituzten presoak kaleratzeko. Lamarcak uste du ETAk indarkeria behin betiko uzteko hartu zuen erabakiaren ondotik irekitako aro politiko berrira egokitu behar dela egun indarrean dagoen kartzela-politika. Arartekoak gogora ekarri du Espainiako Gobernuak "terrorismoaren aurkako instrumentu gisa" diseinatu eta erabili duela espetxe-politika. "Gure ustez, ETAk bere jarduera kriminala betirako eta modu argian utzi du eta orain legea ETAko presoen gizarteratzea ahalbidetuko duen aplikatu behar da", dio txostenean. Ildo horretan, ondoko neurriak proposatzen ditu: sakabanaketa amaitzea eta presoak euskal kartzeletara edo inguruko erkidegoetako espetxeetara hurbiltzea; baldintzapeko askatasuna onartzea; legeak babestutako onurak ematea; eta gaixotasun larriak edo sendaezinak dituzten presoak libre uztea. 

Gara.net: El Ararteko pide un cambio de la política penitenciaria

Etxerat: "EAEko Arartekoarekin bildu gara presoen egoera larriari buruz ohartarazteko"

Argazkia: © Etxerat

Hona hemen Mattin Troitiñok, Etxerat elkarteko bozeramaileak, bilkuraren aurretik egindako adierazpenak:

Etxerat Elkarteko ordezkaritza bat hona etorri gara Iñigo Lamarca Arartekoarekin bildu, eta gure senide eta lagunen egoeraren berri emateko. Lehenik eta behin azaroan egin genuen bilkuran Etxerat Elkarteak egindako eskakizunei erantzun ote dien eta hartutako konpromisoen nondik-norakoak jakin nahi ditugu.

Arartekoarekin egin genuen azaroko bilkuratik hona egoerak okerrera egin du. Orduan, 9 ziren gaixotasun larri eta sendaezinak zituzten presoak, baina orain zerrenda hori areagotu egin dira, 15 direlarik gaixotasun larri eta sendaezinak dituzten presoak. 15 preso hauek aske beharko lukete, eta bereziki larria da Txus Martin presoaren egoera. Bestetik, bizi osorako espetxe zigorra aplikatzen jarraitzen dute, eta 197/2006 doktrina aplikatuta duten presoen kopuruak ere gora egin du, hortaz, 197/2006 doktrina aplikatzen jarraitzen dute. Orokorrean estatu espainiarrak eta frantziarrak espetxe politika berarekin jarraitzen dute. Gure senide eta lagunek bizi duten salbuespeneko espetxe politika honi buruzko txosten sendo bat ere emango diogu, egoeraren berri izan dezan.

Honegatik guztiagatik, Iñigo Lamarca Arartekoari, Gobernu zentraleko Arartekoari, Maria Luisa Cavari, eta espainiar gobernuko Espetxe Zuzendaritzari gure senide eta lagunek eta guk geuk bizi dugun egoeraren berri eman, eta eskakizun zehatzak helaraztea eskatuko diogu. Presoen oinarrizko eskubideak errespetatuak izan daitezen beharrezkoak diren baliabideak martxan jarri ditzaten.