Osasun arloko profesionalek Herrira mugimenduak ospitaletan antolatutako elkarretaratzetara deitu dute

Argazkia: © Etxerat

Mati Iturralde (osasun arloko profesionala):

Osasungintzan lanean ari garen hainbat herritarrek eta eragilek bat egin nahi dugu Herrira mugimenduak datozen ostiralean Donostiako, Bilboko, Gasteizeko eta Iruñeko ospitaleen aurrean deitu dituen mobilizazioekin.

Guk osasunaren eremuan lan egiten dugu. Zentzu honetan, gaixotasun larriak dituzten euskal preso politikoen egoeraz jakitun gara. Espetxeetan dauden hainbat euskal preso politikoren egoera benetan kezkagarria dela ziurtatu dezakegu, eta ondorioak benetan arriskutsuak izan daitezkeela.

LAB: "Azken ostirala dela eta Herrira mugimenduak ospitale zein herrietan antolatutako mobilizazioetan parte hartzeko deia egin dugu"

Argazkian, "Euskal presoak Euskal Herrira! Euskal presoak lantokietara!" lelopean, 35 gizon-emakumek egin zuten elkarretaratzea otsailaren 2an, Algortan, LABek deituta / cc-by ukberri.net

Datorren ostiralean, hilak 24, mobilizazioak burutuko ditu Herrira mugimenduak ospitale zein herrietan eta auzoetan. Eguerdiko 12etan burutuko dira ospitaleetako kontzentrazioak, Basurton (Bilbo), Donostian, Virgen del Caminon (Iruñean) eta Santiagon (Gasteizen). Arratsaldez, ohiko mobilizazioak burutuko dira herri eta auzoetan. Mobilizazio hauen bidez gaixotasun larriak dituzten presoak aske uzteko aldarrikapena zabalduko da.

LABen ustez, muturreko espetxe egoerak gainditzeak izan behar du lehentasuna. Eta horrek, bete-betean, gaixotasun larriak dituzten euskal preso politikoez hitz egitera garamatza.

Abesbatzetako kideek egin dute azken ostiralerako deialdia Algortan

Argazkian, ELA eta LAB sindikatuetako ordezkariak kinkea presoen senideen eskuetatik jasotzen, urtarrileko azken ostiralean.

Euskal preso eta iheslari politikoen eskubideen aldeko Algortako Herri Bilguneak luzatutako gonbiteari erantzunez, herriko hainbat abesbatzetako kideek parte hartuko dute hilaren 24ko elkarretaratzean, 20:00etatik aurrera, Telletxe plazan. Urte bukaerara arte egin bezala, Etxerat elkarteak herriko eragile eta elkarteen esku utzi ditu hileko azken ostiraletako deialdiak, presoen eskubideen babesa herriari dagokiola uste dutelako. Euskal preso eta iheslari politikoen eskubideak babesteko konpromisoa adierazten duen kinkea eragile batetik bestera igaroko da hilabete bakoitzeko azken ostiralean, hurrengo deialdia iritsi arte. Tartean, hilabete oso bat izango du dagokion elkarteak, horren alde lan egiteko. Otsaileko azken ostiralean ELA eta LAB sindikatuetako ordezkarien eskuetatik abesbatzetako kideen eskuetara igaroko da kinkea. Bestalde, Herrira mugimenduak ostiral eguerdiko 12etarako egindako deialdiekin bat egiten du Algortako Herri Bilguneak: besteak beste, Basurtuko ospitale aurrean izango da elkarretaratzea, gaixotasun larria daukaten presoak herriratzea aldarrikatzeko. 

Gaixotasun larria daukaten presoak herrira!