Ongi etorri beroa jaso zuen larunbatean Imanol Beristain

Argazkian, Lolo askatasunaren txapela jantzita / cc-by ukberri.net

2010eko urriaren 22ko "egun ilunean" Itzubaltzeta / Romon "haserrearen plaza" izandako Santa Eugenia, "askatasunarena" bilakatu zuten larunbatean dozenaka gizon-emakumek. Euskal Presoak Euskal Herrira Egunaren baitan, otsailaren 27an espetxetik ateratako Imanol Beristain Gutierrez "Lolo" 29 urteko preso politiko ohi itzubaltzetarra ongi etorri beroa eskaini zioten bertan eskualde osotik heldutako 340 bat lagunek. Bitartean, Frantziatik Espainiara eraman ostean, epailearen erabakiaren zain jarraitzen du preso Loloren anaia Iker Beristain.

Ongi etorri Lolo!

Beris askatu!

Preso guztiak herrira!

Euskal Herriak askatasuna behar du!

 

Hona hemen, ukberri.net agerkari digitalak zabaldutako Euskal Presoak Euskal Herrira eguneko kronika.

Ongi etorri Imanol!

Argazkia: cc-by ukberri.net

Imanol Beristain Gutierrez "Lolo" 29 urteko preso politiko ohi itzubaltzetarra etxean da, emaztea eta hilabeteetako alabarekin. Gaur goizaldeko 2:43ean lehen harrera egin diote auzokideek, ikastolako lankideek eta eskualdeko lagunek, guztira 200 pertsona baino gehiago batu direla herriko Branka kultur elkartearen inguruan. Aurretik, Itzubaltzeta / Romoko mugan, hainbat txirrindularik eman diote ongi etorria, eta bengalak pizturik esprintean eraman dute Brankaraino, adarra joz albistea zabaldu duten bitartean. Adarra eta txalaparta astintzen erantzun dute Brankatik ere, Beristainek senide, lagun, lankide eta auzokideen artean besarkadak, musuak eta irribarreak banatu dituen artean. Herriko Herri Bilguneak lore sorta eskaini dio eta bertan pegatinaz ageri da auzokideek duten hurrengo aldarrikapena: "Kitxu gurekin nahi dugu". Herriak egun duen preso politiko bakarra baita Iñaki Gonzalo Casal "Kitxu". 

ukberri.net:  Harrera beroa eskaini diote Beristaini 200 auzokidek

Imanol Beristain gaur askatuko dute

Argazkian, San Nikolas ikastolako Imanolen lankideek deitu zuten urriko azken ostiraleko elkarretaratzea Algortan.

Imanol Beristain Gutierrez "Lolo" 29 urteko preso politiko itzubaltzetarra askatasunean utziko dute gaur, 30.000 euroko fidantza ordainduta. Itzubaltzeta / Romoko Herri Bilguneak jakinarazi duenez, sendiak goizean ezagutu du Espetxe Zaintza Epaitegiaren erabakia eta 13:00etarako izapide guztiak beteta zuen. Gauzak horrela, gaur kaleratuko dute Beristain, baina auzokideek ez dakite zein ordutan izango den hori. Dagoeneko senide eta lagunak bere bila joan dira Madrilera. Orain bi aste behin-behineko askatasunerako bista izan zuen preso itzubaltzetarrak. Beristain 2010eko urriaren 22an atxilotu zuen Espainiako Polizia Nazionalak Fernando Grande Marlaska epaileak Segiko Ipar Uribeko arduraduna izatea leporatu ziola. Bost egun beranduago, itzubaltzetarrak tratu txar fisiko zein psikologikoak pairatu zituela salatu zuen Amnistiaren Aldeko Mugimenduak. Besteak beste, poltsa, kolpeak eta mehatxuen berri eman zuen. Harrez gero, prebentibo egoeran daukate Alcala espetxean, Getxotik 413 kilometrotara. Bertatik aterako da gaur. 

Ongi etorri Imanol!

ukberri.net: Imanol Beristain gaur askatuko dute

Euskal presoen aldeko bilgunea eratuko dute bihar Itzubaltzetan

Argazkian, Beristain atxilotu zuten egunean / cc-by ukberri.net

Bihar, ostirala, euskal preso politikoen aldeko Itzubaltzeta / Romoko herri bilgunea jendaurrean aurkeztuko da. Hitzordua herriko kultur etxean jarri dute, arratsaldeko 7:30ean eta bertaratzeko deia egin diete auzokide guztiei, "zuen ekarpenak, iritziak eta lanerako gogoak lan talde honen zutabeak definituko dituztelako". Antolatzaileek jakinarazi dutenez, herri bilguneak "era askean egingo du lan". Xedeei dagokienez, "euskal preso politikoen askatasuna eta hauen eskubideen defentsa" lortzea izango dituzte helburu. Haien ustez, egun bizi den giro politikoa dela eta, "orain da momentua euskal presoen problematikari inoiz baino indar handiagoz ekiteko". Euskal preso politiko guztiak hizpide izango badituzte ere, arreta berezia jarriko diete Iñaki Gonzalo Casal "Kitxu" eta Imanol Beristain auzokide gatibuei.

Imanol Beristainen urtebetetzea

Argazkian, Imanol Beristainen lankideak urriko azken ostiralean Algortan / Etengabe

Imanol Beristain Itzubaltzeta / Romoko preso politikoaren urtebetetzea abenduaren 20an izan da, joandako asteartean.

Eguna pasatu da, baina oraindik aukera ona ere badugu, postal, gutun edo zerbait bidaltzeko, urteak egiteaz batera bere konpromisoan eredugarri dugun gure herritar honi zorionak eta eskerrak eman eta gure elkartasuna adierazteko.

Zorionak Imanol, eta eskerrik asko erakusten duzun adore eta kemen horregatik!

Helbidea:

Imanol Beristain Gutierrez

C.P. Madrid II

28870 Alcala de Henares (Madrid)

Urriko azken ostirala bertsotan eta argazkitan

Urriko azken ostiralean Itxaso Paiak egindako ondoko bertso polit hau eskaini zioten Imanol Beristaini San Nikolas ikastolako bere lankideek:

Etxean utzitako bi poz,

bi bizitza, bi erregin

ikastola mila lagun

eta hamaika ahalegin

herritik urruti nola

liteke aurrera egin?

Imanol zu gabe dago

ikastola hain desberdin

zenbat gutun, kilometro,

zenbal bisita, zenbat min...

eteteko desioa

beteko da soilik baldin

ozen kantatzen badugu

bueltatu zaitezen arin

faltan zauden azkenengo

ostirala izan dadin

Urriko azken ostirala

Urriaren 28an azken ostiraleko mobilizazioa egingo da Euskal Herriko herri eta auzo guztietan, Egin Dezagun Bidea ekimenaren dinamikaren barruan.

Algortan Imanol Beristainen San Nikolas ikastolako lankideek egin dute hile honetan Azken Ostiraleko deialdia. Imanol Beristain 2010eko urriaren 22an atxilotu zuten Segiko kidea izatea leporatuta, torturatu egin zuten eta, harrez gero, prebentibo egoeran daukate Alcala Meco espetxean, Getxotik 413 kilometrotara.

- Eskubide guztiekin, Euskal Presoak Euskal Herrira!

- Kondena bete duten PRESOAK KALERA! 3/4ak bete dituzten PRESOAK KALERA! Bizi arteko dotrina indargabetu!

- Gaixotasun larriak dituzten PRESOAK KALERA!

- Isolamendu eta bakartzearekin bukatu