Eskuratu Adierazpen Egunerako pegatina Amnistian edo Abianen!

Joan den asteazkenean egin zuten urtarrilaren 12ko manifestaziorako baimen eskaera Bilbon, eta ondoren sustatzaileek deklarazioak egin zituzten prentsaren aurrean. Herri Mobilizazioa jasotzen ari den babesa eskertzeaz gain, ostegun honetan, abenduak 20, egingo den Adierazpen Egunean parte hartzeko deia zabaldu zuten. Egun horretan, herritar guztiak pegatina batekin ateratzera gonbidatu zituzten. "Nork bere lantokian, eskolan nahiz kalean, nahinora doala ere, pegatina soinean jantzita bere atxikimendua adieraztera gonbidatzen dugu", azaldu zutenez. Algortan, Amnistia tabernan eta Abian kultur elkartean izango dituzue eskura pegatinak.

Ez dugu izaterik aske haiek gabe. Haiekin askatuko baigara gu ere!

Euskal preso eta iheslari politikoen eskubideak aldarrikatzeko asmoz, 219 lagun elkartu ginen atzo Algortako Telletxe plazan, apirileko azken ostiraleko elkarretaratzean. Atzokoan, Amnistiaren Aldeko Mugimenduan ibilitako herrikideei egokitu zitzaien elkartasunaren kinkea hartzea. Modu horretan, urte guzti hauetan amnistiaren alde eta errepresioaren kontra aritutako lagunei gorazarre egin nahi izan die Algortako Herrira bilguneak. Bitartean, beraiek tortura, kanporaketa, sarekada, jazarpen, sakabanaketa, isolamendua eta deportazioarekin amaitu eta preso eta iheslariak etxera ekarri arte borrokan jarraitzeko deia zabaldu zuten. Horren adierazle, kanaberaz egindako espetxea apurtu ere egin zuten. Anje Duhalderen "Amnistiaren dema" entzunez eta kantatuz amaitu zen ekitaldia.

Ertzaintzaren jazarpena Algortan eta Itzubaltzetan

Argazkian, aurreko egunekoa salatzeko, larunbatean Algortan agertutako pankarta / cc-by Ukberri.net.

Dozenaka ertzain bidali zituen ostiralean Algortara Eusko Jaurlaritzaren Herrizaingo Sailak, Aitor Elortza Unanue iheslari politikoa zenari duela sei urtetik egiten zitzaion omenaldia galarazi eta Amnistia tabernatik herriko presoen argazkiak bahitzeko (bertan ez zegoen irudirik). Arratsaldetik ibili ziren gora eta behera, gutxienez, zazpi furgoneta (Brigada Higikorrekoak tartean), kamuflatutako beste bat eta hainbat patruila auto. Baina ez ziren bakarrik horretara mugatu: Telletxe plazan ostiral guztietan egiten den presoen aldeko elkarretaratzea ere galarazi egin zuten, Elortzaren aldeko omenaldia debekatuta zegoelako aitzakiarekin. Kontzentrazio horrek baimena zeukala onartu zuten, eta debekua justifikatzeko esan zuten baimena eskatu zuen pertsonari telefonoz deitu ziotela, baina ez zuela telefonoa hartu. Pertsona horren telefonoak, ordea, ez zuen Ertzaintzaren deirik erregistratu.

Gabonetan Algortan, presoak etxera!

Elkartasun denda Durangoko Azokan

Euskal Liburu eta Disko Azokaren egunetan, hau da, abenduaren 4tik 8ra bitartean, Elkartasun Denda izango da Durangon bertan. Amnistiaren Aldeko Mugimenduaren material guztiak aurkituko dituzu bertan.

Horretaz gain, azokaren eremuan Presoen Lagunak eta Ataramiñe elkarteek stand bana jarriko dute, elkarren ondoan.

Etxerat: "Euskal jendartearen gehiengo zabal batekin batera, gure senide eta lagun presoen eskubideak errespetatuak izatea exijitzen jarraituko dugu"

Entzun berri ditugun testigantzak, gure senide eta lagun presoek pairatzen duten errealitate gordinaren adibide bat besterik ez dira. Izan ere, erabilpen, errepresio eta mendeku klabetan eraikia dagoen espetxe politikak etengabe urratzen baititu oinarrizko eskubideak.

Errealitate krudel eta triste honi berehalako amaiera eman behar zaio. Euskal preso politikoen senide eta lagunak arrisku larrian gaude. Astebururo, edozein errepide edo bihurgunetan gure bizitzak jokoan daude. 2011an, 13 dira pairatu ditugun ezbeharrak eta azken 22 urtetan 400 dira sufritutako istripuak.

Astebururo milaka lagunek milaka kilometro egin behar izaten ditugu bisita bat burutu ahal izateko. Hortaz, probabilitate kontua da istripu bat pairatzea. Errusiar erruleta maltzur honekin berehala amaitea exijitzen dugu. Ezin dute gure bizitzekin jolasten jarraitu.

Euskal Preso Politikoen Kolektiboaren agiria

Hiru hamarkada luze igaro dira 1977ko abendu hartan, Euskal jendartearen bultzada eta indarrak espainiar kartzelatan zuten azken preso politikoa atera zuenetik. Espainiak Euskal Herriarekin mendeetan zehar mantentzen duen gatazkari benetako irtenbidea eman ez, gatazkaren oinarri den euskal herriak bere buruz erabakitzeko eskubideari heldu ez eta berehala, 1978ko urtarrilean espetxeak euskal jendez betetzen hasi zen Espainiako aparatu errepresiboa. Gatazkaren oinarrizko arrazoien konponbideari lotutako Amnistia aldarrikapenaren esanahia hustu eta gure herriaren zapalketa eta bere eskubideen ukazioen oinarri-pean ekin zion espainiar estatuak bere trantsizioari. Ez zuten baina, Euskal Herriak bere eskubideei uko egiterik lortu. Mendeetako askatasun goseak herritarrak borrokari lotuta jarraitzera eraman gintuen. Ehunka baino milaka izan gara azken hamarkada hauetan atxilotu, torturatu eta espetxeratuak izan garenok, baita ihesari ekin diogunok ere. Espainiar Estatuaren zapalkuntza, ankerkeria, krudelkeria eta mendeku gosea bizi izan ditugu; bizi ditugu oraindik. Espainian iruzurrez iruzur sorturiko demokrazia ezaren garai haietatik egungo sakabanaketa politika hiltzailearen errealitaterainoko sufrikarioa. UCD, PSOE zein Alderdi Popularraren esku faxista, mendekatzaile eta odoltsuek gure kontra kolpez kolpe eginiko marra gorri latza, alegia.